Minevä puulpäävä peeti Vana-Koiola küläplatsi pääl keväjälaatu. Väiku vahtsõnõ laadukõnõ and’ ilosa alostusõ mi kandi laaduhuuaolõ.
Laadu kõrraldi MTÜ Vana-Koiola Kogukond üten Vana-Koiola rahvamajaga. «Minevä aasta pruuvsõmi ja nuu, kiä ummi aiakasvõga tulli, kitivä, et mahlakuu lõpu laat om põnnõv. Mõtlimi, et proovimi seo aasta jäl,» kõnõl’ MTÜ Vana-Koiola Kogukond vidäjä Jakini Egle. «Teemi otsa vallalõ ja sis läävä tõõsõ laadu edesi. Tan saava kauplõja kah hinnäst laaduaos käümä tõmmada,» selet’ rahvamaja juhataja Perlovi Bibi mano.
Innekõkkõ kõrraldõdas taad laatu umakandi rahva pääle mõtõldõn ja külärahva toega. «Täämbä olõ ma küdsänü viis esisugumast kuuki kohvikulõ, Bibi pandsõ ola ala üte koogiga, seokandi mehe tei suppi. Nii et kõik saava midägi tetä-toimõnda ja tundva, et näid om vaia,» löüdse Jakini Egle.
A miä pand kõrraldajit laatu tegemä? «Eks taa sääne sisemine palaminõ om, miä taht vällä saia. Täämbädsest laadust om hää miil: om poolõ inämb kauplõjit ku minevä aasta. Ilm om kah hää. Ja ku mõtõlda tulõvadsõ ao pääle, sis mille mitte taad tetä – veidükese om toimõndamist, a saami nakkama,» ütel’ Perlovi Bibi.
Õigõ laadu pääl omma ka rahva naarutaja. Mi kandi kõgõ tunnõtumba laadunaarutaja omma Laheda muti, kiä peri säältsamast Vana-Koiola kandist, ja nä teivä seogi kõrd rahvalõ nall’a. Muti Anni, Tooni ja Senni seleti perän ülesastmist läbisegi, et umakülä rahvalõ om rassõmb midägi kõnõlda ku kavvõmbal. «Nä omma meid sada tuhat kõrda nännü, piät iks mõtlõma, midä seletät. Umakandi rahvas om mi eloga nii kursin, tuuperäst võtsõmi «innovatitiivsit» teemasit mano.» Ja tõtõstõ, muttõ jutu olli seokõrd ideekorjamisõst, Facebookist ja suunamudimisõst. Rahvalõ nali miildü ja mitmõ tahtsõva perän üten muttõga pildi pääle saia.
Lisas paiklikõlõ oll’ laadu pääl kavvõmbat rahvast kah. Umakasvatõdu lille möönü Kenderi Elgita Kärgulast kitt’ nii seod ku kõiki tõisi keväjäidsi laatu: «Tan omma nii ägedä inemise. Meil om joba müüjist sõpruskund tegünü ja ostja omma kah sõbraligu.»
Midä inemise keväjä ostva? «Kõgõpäält võõrasimä ja kannikõsõ, sis suvõlilli, edesi tulõva köögiviläkasvu,» selet’ kogõnu müüjä. Säändse kraamiga kauplõja piät rehkendämä, et aig, ku timä kaupa tahetas, ei olõ kuigi pikk. Tuuperäst om Kenderi Elgita võtnu plaani minnä seo kevväi inämbüisile paiklikõlõ laatõlõ. «Nursi, Varstu, Kanepi, Urvastõ, Tsooru,» lugi tä ette, kohe plaan järgmäidsil nädälivaihtuisil kauplõma minnä.
Rahmani Jan
Laheda muti Vana-Koiola rahvamaja iin laadurahvalõ nall’a tegemän. Rahmani Jani pilt