Vana nall’alugu kõnõlõs, kuis väega tark autoasjatundja pidä tõisilõ tarkulõ loengut sisepalamismootori tüü põhimõttiist. Loengu lõpun küsüs kullõjiide käest: kas kõik oll’ arru saia? Tälle vastatas, et kõik pääle tuu, kuis tä õks edesi liigus, ku hobõst iin ei olõ.
Vaivalt küll jõudsõ tuu lektor inne ullisminekit mõnõlõ kullõjalõ asja kõrralikult selges tetä. Inemise lihtsält harisiva asjaga är ja es nakka inämb ilmaasjanda (?) pääd murdma.
Ma olõ umma 70 aasta pikkust kogõmust kanakasvatusõn püüdnü siin ku sääl edesi anda. Tulõmus om umbõs tuusama mia autooppusõn. Inemine või sullõ su artikli sisu pääst üles üldä kasvai unõ päält, aga kotun tege õks tõisildõ. Nüüt ma piasi tuuma näütiid.
1. Külm laut. Inemine kurt, et täl ei olõ laudan lehmä, kiä olõs kannu lämmistänü. Mis sis, et ei olõ. Noh, kannul külmäs hari är, jala kah. Jala külmäse sis, ku likõs saava. Näütüses vedelä lehmäsita seen. Vai ku lauta ei olõ sukugi allapannu (saepuru, hüüvlilast, põhk jne) pantu.
Pall’u hullõmb hädä om tuu, et ku laut om tõtõstõ külm, sis külmäse muna paari tunniga pessä är. Ma ei olõ viil Eestimaalt löüdnü pernaist, kiä ollu nõun egä katõ tunni takast kanapessi kontrolma.
Harju külmämisele om aga lahendus muial. Neläst levinüst harjatüübist külmäs är õnnõ lehthari. Milles noid kannu sis Eestimaal üldse pidädä? Vastus om, et munakana arõtõdi Itaalian (Leghorni tõug, mia om arõtõt Livornon), kon probleem ei olõ mitte külmämise, a ülekuumõnõmisega.
Külmämise punkti võinu lõpõta lausõga, et midä suurõmb hari, toda rohkõmb nõud huult. 2023/2024 talv oll’ Eestimaal üts külmembiid. Tollõgipoolõst elli mul üts kikas ja ports kannu vällänpuul lauta – üle elli. Põra nuu kana munõsõ.
2. Kanapoigõ hautamine. Pellätäs, et kana ei istu kõrralikult pesä pääl, lahk munnõ. Kõik muna jääse mädäs. Arvada kikka süü. Ku näütät pernaasõlõ är tõõlise kurieläjä, väikese verd imevä putuka, sis tollõ vasta kiäki midägi ette ei võta. Mul om ollu juhussiid, kos vana kana imetäs verest nii tühäs, et koolõs munnõ pääle är. Ütskõrd jõudsõ esiki osa poigõ är kooruda.
Nii et kokkuvõttõs: ku kana pakõs munnõ päält är, sis tä pakõs är surma iist. Tuud ei saa jo hukka mõista.
Pulga Jaan
Jutt lätt järgmädsen lehen edesi.