Seol nimel om Eestin 48 kandjat. Nimi panti katõn paigan: Haani mõisan Võrumaal ja Uvve-Kariste mõisan Mulgimaal.
Haanin Kallastõ külän panti seo nimi Ommelka Miku Jakapi poigõlõ. Rõugõ keriguraamadu kirutasõ vanan kiräviien Woddi, mõisa hingelugõmistõ 1826 panti nimi kujul Wodi. Arvada, et välläütlemine oll’ iks [vodi], a kõrvalõ jättä saa ei ka II välten välläütlemist [voodi]. Kerigu hingeraamatun 1796–1830 om sama perrega ütenkuun kirja pant ka tuudaigu joba koolnu kodapoolinõ Woddi Hint. Timä poig Piitre oll’ abielun läsänaasõga. Naasõ latsõ olli nekrutis võetu, Tartu ja Peterburi liina saadõtu. Om peris usutav, et Vodi nimi võisõ suulidsõlt lisas Hindulõ kävvü ka Jakapi kottalõ, et priinimes sai joba olõman lisanimi. Haani Vodi nimi nakas’ ka peris ruttu lakja minemä, näütüses jõudsõ joba 19. aastagasaa keskpaigan Pääsnä küllä Räpinäl.
Kost Haani Vodi nimi tulõ? Teedä om, et Kallastõt ehk Vodiküllä om kutsut ka Hodikülä. Hariligult om nii, et ku võru keelen vaihtõlõsõ v- ja h-, nigu näütüses sõnnun vundament ja hundament, sõs om lainuandjan keelen tuu kotusõ pääl f- (фундамент). Samma muudu om võimalik, et vinne nimi Фо́тий (Foti) [footi] om andnu Vodi varjantsiga Hodi.
Vinne nimevarra om Foti tulnu kreeka keelest. Patriarh Photios Suur elli Konstantinoopolin 9. aastagasaal. Tä om aolukku lännü ku bulgaarlaisi ristjä. Photiosõ üts tähtsämbit teossit om «Bibliotheca», antiiksõ kreeka kirändüse antoloogia. Nimi Photios om kreeka keelen saad sõnast phōs ’valgus’, miä om alussõs ka sõnalõ foto.
Uvve-Kariste mõisan (Halliste) panti priinimi Woddi Muriku talust peri viie pojaga suladsõperrele. Sääl olõ-i inne olnut lisanimme nätä, nii et rassõ om üteldä, minkast Mulgimaa Vodi tulõ.
Eestistämisel muudiva sama nime katõ kiräpildi kandja Vodi ja Voddi üten kotussõn ja ütel pääväl uma vana nime nimes Voolaid. Tuu juhtu 1938 Tapa liinan.
Saarõ Evar
Rubriigin kõnõldas perekunnanimmi periolõmisõst ja tähendüsest.