Käävä jutu ja liigusõ kaardipildi, et riigi kaitsõinvesteeringide keskus taht Tsiatsungõlmaa nime vällä vaihta vahtsõ nime «Reedo linnak» vasta. Tuu om väega halv plaan.
Kuigi säälsaman kõrval om Reedopalo ja tuuperäst ei olõki vahtsõnõ nimi võlss, om nimi Tsiatsungõlmaa midägi säänest, mink üle võrokõsõ uhkust tundva. Et tuud nimme om eestläisil ja esieränis vällämaalaisil rassõ vällä üteldä, ei saa olla põhjus nimi vällä vaihta. Õkva tuusama asi, et taad om tõisil rassõ vällä üteldä, omgi võrokõisi uhkusõ põhjus. Pääle tuu om Tsiatsungõlmaa väega illos nimi ja and ka aimu, midä sääl tetäs. Tsiatsungõlmaa nimi piät alalõ jäämä ja ku tuud tahetas salamahtu ja sälätakan är muuta, om asi väega halv.
Paigapäälitsest keelest, kultuurist ja inemiisist ülesõitminõ om õkva tuu asi, miä õhutas vihha ja vandõnõvvujuttõ. Kinkalõ tuu kasulik om?
Rahmani Jan,
Uma Lehe päätoimõndaja