Mino meheveli oll’ ettevõtja miis ja tegi 1950. aastidõ alostusõh umalõ pojalõ auto. Ilosal autol olliva pedaali. Ku noid sõksõt, liiku massin edesi kah. Auto oll’ nigu peris: tsõõri all, ruul olõmah. Massin värviti vereväs. Latsõ es taha süümä ja õdagu auto mant kodo minnä.
Esä oll’ kõva pilditegijä ja pildist’ auto üles kah. Poisi kasvi suurõs ja lätsi kotost minemä ja auto jäi pall’odõs aastis tarõ pääle saisma.
Ma näütsi toda väikeist pildikeist ütskõrd tüü man. Tuukõrd trehväs’ üts Tarto mänguas’amuusõumi tüütäjä Põlva raamadukogoh olõma. Nägi pilti ja nakas’ küsümä, kas om alalõ ja saasi muusõummi.
Kõnõli sis papa Hansulõ muusõumitüütäjä tahtmisõst. Tä oll’ nõuh ja poja kah ja nii sis rännäs’ki tuu auto muusõummi. Putitõdi tedä ja tä sais täämbägi muusõumih. Umanik Vambola om veenü uma latsõlatsi kah hindä massinat kaema.
Sirka
