Mine mõtsa!
Ma kuuli raadiost, et üts mikandimiis läts’ eelä Lätti. Tuu mehe nimi es olõ külh Korsakov, tuu oll’ täütsä president Karis. President läts’ hääst tahtmisõst naabrilõ tere ütlemä, a kuri koroona oll’ toolõ as’alõ vasta ja Läti president panti luku taadõ. Ni pidigi mi president är tagasi kodo tulõma.
Sügüse lätsivä sammamuudu Lätti kats kahrupoiga. Lätläse es olõ noidõ kahrõ elokombidõga sukugi rahul. Vet näil olõ-i sada aastat mõtsah kahrõ olnu, nii es mõistä lätläse äkki kaala sadanut elorikkust hinnada. Ja saadõtigi kahrupuja meile tagasi. No Karis pruuvsõ sõs Suumõ minnä, a suumlaisil oll’ kah president haigusõga lähküst kokko puttunu ja plaan läts’ summa. Nii omgi, et olõ-i mõtõt vällämaalõ tükki. Mine parõmb mõtsa!