Seod nimme kand Eestin 55 inemist. Umbõs katõssa om hääldüsperätselt kirja pantu nimekuju Tsilmer kandjit ja alla kuvvõ nimekuju Zillmer kandjit.

Nimi panti õnnõ Karula mõisan, kolmõlõ perekunnalõ, kiä elli Tsilimiku, Lajassaarõ ja Mähkli külä Andsi talun. Näide ütist edevanõmbat saa ei lihtsäle kimmäs tetä. Teedä om, et Lajassaarõ Andrus oll’ Reinu poig, timäst põlvkond vanõmb Tsilimiku Jukk (snd 1761) oll’ Tsili Miku Andrussõ poig. Andsi Kaarli olõs nigu olnu Mäekonnu Taaveti kõgõ vanõmb poig, a tuu Taavet ja timä tõsõ poja saiva hoobis tõsõ priinime – Ploom. Hariligult tulõva säändse juhtumisõ tuust, et perre kõgõ vanõmb poig oll’ esäle hoobis kasupoig.

Priinimi, mis edimält panti kirja kujul Zillmer, om saad Tsilimiku (Zillimiko) talu nimest, midä om veidü lühendet (Zillm-) ja otsa liidet saksa keele muudu lõpp -er. Ku Jukk 1761. aastagal sündü, om timä essä kirotõt Zilli Miko Andrus. Viil varõmb, 1744. aastaga, om peremehe nimme kirotõt Silla Mick, 1681. aastagal roodsiaigsõt peremiist kah sama edenimega Sille Mick. Roodsi aigu kirotõdi s-iga hellü -ts, tuud näütäs viil vanõmb kirjapandminõ Korijärve Tsili külä kottalõ: 1638 Zilli Jürgen.

XIX aastagasaa alostusõn mugandõdi Tsiles tuu ao Karula kihlkunna moodunimme Celestin. Nii om Alakonnul elänü Zölestin Zillmer mitman tõsõn kirjapandmisõn Zille Zillmer. Vana Tsilimiku talunime alussõs XVII aastagasaal om üte tõsõ edenime mugandus Zille vai Zilli. Tuus nimes oll’ saksa Zilliax. Zilliax om Rooma kristligu pühämehe ja märtri Cyriacuse saksa muudu nimekuju.

Nimmi eestistämine putut ka seod perekunnanimme. Vana nime Zillmer asõmalõ võeti Mändla Vaabina vallan ja Sillama Hiiumaal Kõrgessaare vallan. Nimekuju Zilmer kandja võti Sillamaa Kasaritsa ja Vana-Kuuste vallan, Silmere Krüüdneri vallan, Ruut Kaagjärve vallan. Vahtsõ nime Talmet Antslan omma võtnu nellä erinevät vana nime varjantsi kandva inemise: Zilmer, Zillmer, Tsilmer ja Tsillmer.

Zilmeri hõimu kuulsa tohtre Mihkli ja spordimiis Kaarli jaos om inne mainit Tsilimiku Jukk Geni perrä kõgõst vanaesä vanaesä. Häste pikä põlvkunna omma tuun suguvõsaliinin hariligu, latsi om saad viil ka 50. ja 60. eluaasta vaihõl.

Saarõ Evar

Rubriigin kõnõldas perekunnanimmi periolõmisõst ja tähendüsest.

Üts lugu tagasi
Järgmäne lugu
Jaga seod artiklit