Nimel Rauba om Eestin 113 kandjat, nimel Raup 32 kandjat. Mõlõmba nime omma tävveste Võrumaa uma, pantu kolmõn Rõugõ kihlkunna mõisan.
Leevi mõisan oll’ täämbädses kaonu Rauba talurühm, kon panti nimes Rauba. Leevil pantu nimi levisi joba 1844. aastal ka Räpinä kihlkunda Saarõküllä. Saalussõ mõisan om Rauba külä (Vahtsõliina alõvi lähkün, Jõõdasküläst üle oru). Sääl pand’ opõtaja Marpurg edimält Raup, a 1826. aasta hingelugõmisõn om mõisan pantu nimekuju Rauba. Ka keriguraamatin parandõdi tuu suurõ suguvõsa nimi kujulõ Rauba. Haani mõisan om Kaloga külä Rauba talu, kon panti Raup nii keriklikult ku hingelugõmisõ perrä. Inämbäste om Raup sõs Haanist peri. Lövvüs sõski näütit, kon ka Haanin pantut nimme om naat kirutama umasütlejä käände kujul Rauba.
Üts Rauba nime pandmine oll’ viil 1921. aastal Setomaal Lobotka vallan. Tuu sai olla kas iinkuju Võrumaalt vai peris sugulus siinpuul piiri Rauba nimmi kandnuidõga.
Nigu nätä, om Rauba lisanimi kõigin kolmõn paigan vanõmb ku 200 aastat tagasi pantu priinime. Revisjoni näütäse, et Leevile ja Saalustõ levisi nimi pääle Põh’asõta, 1744 Leevil Raupa Thomas ja Saalusõn Rauba Kerstna. Haanin om nimi roodsiaignõ: 1684 kaardi pääl (kiräviaga) Roppa Tarßten ja Roppa Andre, 1688 revisjonin kolm peremiist: Raube Kerstne Hindt, Thomas ja Andre. Kaardi perrä olli näide talu sääl, kon parhilla om Resto külä.
Minkast nimi tulõ? Üts ja kõgõ usutavamb võimalus om, et nimi näütäs edevanõmba tulõmist Läti ala päält Straupest (Valmierast lõuna puul, Tartu-Riia tii veeren), minka nimi saksa keelen om Roop ja midä 19. aastasaal kirotõdi ka eesti keelen Raupa.
Tõnõ võimalus om, et nimen om seen saksa keele sõna rau ~ rauh ’kahrõ, jämme, jõhkra, häbemälda’. Tuust om tett mitmit saksa keele sõnnu. Raubauz (rau+bauz) näütüses om prosta inemine, kiä tunnõ ei häid kombit, pidä hinnäst üllen nigu tsiga. Tuu sõna om seen Harglõ Koikkülä talunimen Raubatsi. Tõnõ saksa sõna om raufen ’kakma, taplõma’ ja säält tulõtõt Raufbold ’tapukikas’. Ka sääl olõssi võimalik, et f-ist om saad -b vai -p, minkast Rauba nime seletämise man kuigi müüdä ei päse. A näütüses *raubatsist lühenemine om sõski õnnõ teoreetiline võimalus ja Läti kotussõnimi sobis seletüses parõmbalõ.
Saarõ Evar
Rubriigin kõnõldas perekunnanimmi periolõmisõst ja tähendüsest.