Kost sahvt kumpvegi sisse sai?
Ma kuuli raadiost, et valimisõ saa es viil kõrraga läbi. Om inemiisi, kiä olõ-i uma silmäga nännü, kuimuudu nuu valijidõ helü internetitraatõ pite juuskva ja õigõ kotussõ üles leüdvä.
Ega ma esi kah siin eloh kõikist asjost arvo ei saa. Jo latsõpõlvõh oll’ keerolinõ küsümüs, kuimuudu sahvt iks kumpvegi sisse om saanu. A niipall’o ma tiiä külh, et massina omma targõmba ku inemise. Ja ku ma saaki-i täpsele arvo, mis mu puutri seeh om, piä ei tuuperäst kiviaigu tagasi minemä. Nelä aasta peräst võissi õnnõ e-valimisõ ollaki.