Võrokeelidse laulu- ja rahvapido Uma Pido kõrraldustoimkund om otsustanu järgmädse pido varõmb plaanitust aasta jago edesi tougada. No om otsustõt, et kuvvõs Uma Pido tulõ Põlvan Indsikurmun 1. piimäkuul 2024. aastagal.
Mille sääne otsus tetti, seletäs Uma Pido projektijuht Tigasõ Merike: «Keerolidsõ ao peräst om mitmõ laulupido toimumisõ aigu muudõtu. Nii om edesi tougatu ka XIII nuuri laulu- ja tandsupido, miä peetäs no 2023. aastal, ja XXVIII laulu- ja XXI tantsupido, miä peetäs aastal 2025. Uma Pido kõrraldaja omma pido plaanmisõ man rehkendänü tuuga, et võrokeeline laulu- ja rahvapido ei olõs samal aastal suuri üleriigiliidsi laulupitõga.
Ollimi no saisun, kon üleriigiline nuuri pido olõs olnu samal aastagal ku mi Uma Pido. A teedä om, et suuri pitõ laulukava om küländ rassõ ja opminõ nõud koorilauljidõ, esieränis latsi käest suurt tüüd. Ku samal aastagal olnu lauljil vaia viil võrokeeline laulukava selges saia, sis arvada, et pall’o koori olõs ütest pidost är ütelnü. Uma Pido kõrraldaja tahtva, et laulja saanu nauti pido ettevalmistust ja ildampa pidost rõõmu tunda.
Uma Pido om koorilauljidõ jaos olnu kõgõ oodõtu, seod rõõmu ei taha näilt är võtta ja pingit mano tekütä. Taa oll’ väega rassõ otsus ka tuuperäst, et üts põlvkund latsi ei pruugi võrokeelitsest laulupidost lauljana ossa saia. Peimi plaani ka pido aasta varatsõmbas tuvva. Tuu jaos piäs koorõlõ sügüses olõma valmis noodivihu, a pido ettevalmistaminõ olõ-i viil nii kavvõndalõ jõudnu. Parhilla säetäs kokko laulukavva ja tuu man loodõtas lissa saia ka koorilaulõ ja -säädide konkursilt, miä käü kooni 1. põimukuuni 2021. Ka tuu olõ-i viil kimmäle teedä, kas koori ülepää saava sügüsest vahtsõst kuun laulma naada.»
UL