Vahtsõliina rahvamaja om käümä touganu vahtsõ ettevõtmisõ – võro keele ja kultuuri omnibussi. Tuu tähendäs, et huvilidsõ viiäs bussiga sõitma ja näile näüdätäs kotussit, miä omma köüdedü paiklidsõ kultuuriga. Edimäne sõit tulõ 17. süküskuul, ku kiränik Koorti Erkki näütäs bussirahvalõ noid paiku, miä omma tutva timä raamatist.
«Seo om sääne lõbus retk võrokeelitside seletüisiga,» kõnõlõs Vahtsõliina rahvamaja juhataja Lõhmusõ Anneli. Mõtõ naada säändsit bussisõitõ kõrraldama tull’ tuust, et taheti vahtsõnda egä aasta peetüt Vahtsõliina perimüspäivä. «Muido om meil iks olnu rohkõmb uma rahva pido, mängu ja laulu, a mõtlimi, et teemi seokõrd tõistmuudu, et olõs vaeldust meile ja tõisilõ kah,» seletäs tä.
Mõttõlõ and’ huugu mano Koorti Erkki raamaduesitlüs. Et kiränik käü Vahtsõliina rahvamaja mano rahvatandsu tandsma, oll’ kõrraldajil lihtsä tedä ka edimäst ekskursiooni vidämä kaubõlda.
Edimäne reis alostas 17. süküskuul kell 9 Vahtsõliinast. Buss sõit Võrolõ ja sis mindäs Kiräpää kandsi mano, edesi Misso (Pugola) kanti ja kõgõ lõpus Vahtsõliina kandsi mano.
Lõhmusõ Anneli ütles, et ku edimäne sõit kõrda lätt, sis proovitas vahtsit sõitõ kah vällä märki. Edimält pututasõ plaani Vahtsõliina kihlkunda, mõtõ om viil kävvü Prandsu Hindriku, Sandra Jaani ja Ast-Rumori Karli rato.
Edimädsele bussisõidulõ saava huvilidsõ hinnäst kirja panda kooni 15. süküskuu pääväni meiliaadrõsi VastseliinaRahvamaja@edu.voruvald.ee vai telefoni 5345 4214 pääl. Bussiga mahus sõitma 47 inemist.
Rahmani Jan
Võro keele ja kultuuri omnibussi ellokutsja, Vahtsõliina rahvamaja juhataja Lõhmusõ Anneli. Rahmani Jani pilt