Võro instituut ja Kauksi Ülle kõrraldasõ 23.–24. süküskuul kiräniku tsõõriku tähtpäävä puhul katõpäävädse konvõrendsi, kon pääle ettekandidõ kullõmisõ saa kaia kattõ tiatritükkü, vahtsõt luulõkoko ja tekstiilinäütüst ni tunda mõnnu iloõdakust.
Ettekandõ Obinitsa küläkeskusõn nakkasõ edimädsel pääväl pääle kell 14. Kõnõlaman omma Pajusalu Renate ja Karl, Viidingu Taive, Kalkuna Andreas ja Paaveri Ene. Kõnõldas Kauksi Ülle kiilist, timä loomingust rahvaluulõ saisukottalt kaiõn ja tiatriteost. Näüdätäs Kauksi Ülle vahtsõt luulõkoko «Vaest lätt üle».
Õdagu kell 17.30 kandva Tal’na Võro seldsi näütetrupp Tungõl ja lauluansambli Liiso ette Kauksi Ülle näütemängu «Kolm hinnapakmist». Kell 19 saa Seto ateljee-galeriin kaia Kauksi Ülle näütemängu «Nigu nõidus», midä mäng Obinitsa Uus Teater.
Puulpäävä, 24. süküskuul kõnõlasõ Kõiva Mare, Velskri Mart, Mattheusõ Ave, Saarõ Hipp, Kalla Urmas, Reimanni Nele, Prozese Jaak, Oittineni Hannu, Kiluski Ott jt. Kõnõldas kirändüsest, rahvaluulõst, võro keele olukõrrast Nõvvukogo Eesti koolin, õdagumeresoomõ kiili välläkoolõtamisõst, etnofuturismist ku kultuurilidsõ vahtsõstsündümise mõttõviiest.
Päävä lõpõtas pidoõdak, kon astva üles Baaba ja Ka ni duo Laube Kadri ja Niglasõ Ago. Vaihtõpääl näütäs Kauksi Ülle galeriin ka ainulist seto rõivakoko.
Konvõrendsi ettekandidõ osa ja Tunglõ tiatritükk omma Obinitsa küläkeskusõn (koolimaja), tõsõ õdagudsõ as’a Seto ateljee-galeriin.
Kullõja-kaeja saava Obinitsa ja tagasi sõita konvõrendsibussiga. Buss sõit Tal’nast vällä 23. süküskuu hummogu kell 8, võtt rahvast pääle ka Tartun kell 10.30 ja Võrol 11.20 ni jõud kell 12 Obinitsa. Tagasi sõitma nakkas buss pühäpäävä, 25. süküskuu hummogu. Ettekandõ ni iloõdak omma ossavõtjilõ massulda, kõik huvilidsõ omma oodõdu.
Konvõrendsi «Kauksi Ülle 60» mõlõmbast ettekandõpääväst tetäs ka veebiülekannõ Facebookin. Ligembät teedüst saa kodolehe wi.ee päält.
Allasõ Tiia
Kauksi Ülle. Kabuna Kaile pilt