Sõna, millest päämidselt om saad nimi Pilt (298 kandjat), om küländ vana alambsaksa lainsõna. Seoilmaaignõ saksa keele sõna Bild tähendäs samma ja om kah eestläisi perekunnanimes (25 kandjat). Tuusama saksa sõna eesti muudu kirutõdult om kah priinimes, nimel Pild om 37 kandjat. Kõiki näide sama tähendüsega nimmi vannu tegünemise kotussit om kokku 18, noist 14 Eestimaa kubõrmangun ja õnnõ neli Liivimaal. Võrumaal oll’ kats kotust ja tegeligult üten noist – Karstmõisan Kanepi kihlkunnan – pantu Pilt kuuli XIX aastasaa lõpus vällägi.
Sõski, nii nime Pilt ku Pild kandjit om iks suhtõlidsõlt kõgõ rohkõmb Võru maakunnan. Põhjusõs om Vahtsõliina mõisan seo nime saanu suguvõsa, umal aol üts võimsambit Misso kandin. Kimalasõ Piitre perrätulõja Kimalasõ, Lemmätsi ja Preeksa külän, vanõmba velle Jaani perrätulõja Hino külän, noorõmba velle Tanila poig Julga külän, Piitre lelläpoja Juhani perrätulõja Rammuka külan ja Kirbu Märdi pere Preeksa külän saiva 1820. aastagal priinime Pild. Pikkä aigu püssü nimi samal kujul, viil XX aastasaal naati osan perekundõn pruukma nimekujju Pilt.
Nimi Pilt om sündünü ka sada aastat ildampa Setomaal, seo nime võti perekund Petseri ja ütsikimä pojaga Irboska vallan.
Saarõmaal panti Kulli mõisan Pild ja Paju mõisan Bild, a tuud viimäst naati keriklikult kirutama eesti muudu: Pilt. Paju mõisa nime saaja olli peri Pilda talust. Tahassi luuta, et Hummugu-Saarõmaal tunnõtas ka nüüd viil priinime käändmist Pilt: Pilda. Sääl talun elli joba 1685 Pilda Toffer. Talunime peritolu om hämmär, innembi tulõ tuu vanast inemisenimest ku sõnast pilt.
Põh’a-Eestin om nime tegünemise kotussit hulga: kolm mõisat Harjumaal, üts Lääne-Nigulan, üts Hiiumaal, päämidselt Bild, a Rapla Kuusiku mõisan Pilt. Järvämaal oll’ mõisit viis, nime päämine keriklik kuju Pilt. Üten paigan, Varangu mõisan panti edimält kirja Pöld, tähendüsega ’Põld’, a keriklik nimekuju nakas’ olõma Pild.
Virumaal panti nii Bild, Pild ku Pilt kokku nellän mõisan. Triigi mõisa Pild om täämbädse pääväni alalõ püsünü.
Ku Läti Alūksne rajoonin om kellegi nimi Pilds vai naasõl Pilda, sõs om rassõ arvu saia, kas Eestist peri nime alussõs om Vahtsõliina Pild vai Põld. Nii elli Vanan-Laitsnan üts Põllu pere ammõtliku nimega Pilds.
Saarõ Evar
Rubriigin kõnõldas perekunnanimmi periolõmisõst ja tähendüsest.