3.–4. süküskuul sünnüs Varstu kultuurikeskusõn maailma edimäne Võro-Seto NuuriFEST. Et aig om sääne nigu om, sis kandas suurt jako tegemiisist üle ka internetin.
FESTi pääkõrraldaja Laube Kadri ja Valsi Kristi omma saanu huugu katõst Võro maakunna kultuuriruumist. Et kattõ väikut kultuuri ja noid edesikandvit nuuri umavaihõl tutvas tetä ja näide kultuuritiidlikkust kasvata, omma noorõ katõs pääväs Varstulõ kokko kutsutu. Ütenkuun tetäs tiatrit, muusikat, uulidsakunsti, kaias filme ja kontsõrtõ.
FESTi tõnõ päiv nakkas pääle arvamishummoguga «Kirriv ilm – puult ja vasta», midä vidävä Lunge Inga ja Raju Eliisabet. Arvamishummogul arotõdas, kuimuudu jäiä esihindäs, ku olõt tsipa tõistsugumanõ ku tõsõ ja uma tii joba löüdnü, ni kuis seo man õks hoita ja armasta umma perimüst ja kultuuri. Arvamishummogul astva üles Hintsi Anna, Kirchi Kerli, Worthi Katre, Leima Evelin, Truuba Markus, Raju Sandra ja Kanepi Markus. Kõik noorõ ja veidü vanõmba saava arvamishummogul üten arota ja küssü internetin Zoomi keskkunnan.
Ligemb teedüs om FESTi Näoraamadu lehe ja Instagrami konto pääl. Piledi ja ilosa festivalipusa omma müügin Fientan.
Raju Eliisabet
NuuriFESTi üts pääkõrraldaja, Varstu kultuurikeskusõ juhataja Laube Kadri joba uut ussõ pääl tulõvat nädälivaihtust, ku noorõ ummi tegemiisiga maja ello täüs toova. Rahmani Jani pilt.