Tulõval nädälil, 7.–13. märdikuuni, peetäs võro keele nädälit. Seo om joba 17. aastak, ku märdikuu edimädsel täüsnädälil kitetäs võro kiilt ja härgütedäs taad hariligust inämb pruukma.
«Võrokõsõ nii vai nii kõnõlõsõ võro kiilt, kiä inämb, kiä veidemb. A võro keele nätäl sai vällä mõtõldus tuujaos, et tulõta inemiisile miilde, et nuu, kiä mõistva, a egäpäävätselt ei pruugi, võinu vähämbält seo üts nätäl näüdätä rohkõmb vällä, et nä võro kiilt mõistva,» võtt Võro instituudi direktri Kuuba Rainer nädäli päämidse mõttõ kokko.
Nädäli tegemiisi vidä Võro instituut, a kõvõmba ütenlüüjä omma läbi ao olnu ka Vana-Võromaa kooli ja latsiaia. Tuul nädälil tegevä nä ummi tunnõ ja muid tegemiisi inämb võro keelen. Kuuba Rainer kuts ka muid asotuisi ja ettevõttit julgõmbalõ nädäli tegemiisin üten lüümä. «Võinu võro keelen inämb kõnõlda, võrokeelitsit kirjo kirota, võrokeelitsit silte vällä panda. Ka võrokõisi lippu võinu seo nätäl inämb üles tõmmada ja rahvarõivit kanda,» lugõ tä võimaluisi ette.
Timahavvatsõs võro keele nädälis omma kõrraldaja vahtsit tegemiisi kah vällä märknü. Võro instituudi saalin tetäs valla võro keele kohvik, kon iispääväst neläpääväni kellä 9.30–12 kõnõldas käsitüüst, söögist, savvusannast, kirändüsest, muusikast, kotussõnimmist ja mõtsast.
Iispäävä õdagu astus Kruutusõ rahvamajan üles Tagamõtsa Tarmo maailma edimädse võrokeelidse pistüjalapulliga «Kogõmus mass!». Tego om Ruitlasõ Olavi kirotõdu ütemehetüküga.
Joba kolmas aasta saava võro keele nädäli ümbre toimõnda võro keele agendi. Timahavvatsõ võro keele nädäli lõugahus om «Üts süä, kats kiilt».
Nädäli seen näüdätäs vahtsit võrokeelitsit välläandit, tetäs veebiviktoriini, võrokõsõ välläkutsõ mängu, võro kiilt om kuulda ka üleriigi meediän. Täpsempä kavva saa kaia Võro instituudi kodolehe päält.
«Kõrralda ka esi mõni võrokeeline üritüs tüül, koton vai küläplatsi pääl,» kuts projektijuht Toomõ Triin kõiki üles taad nädälit pidämä.
Rahmani Jan
Võro keele nädäli projektijuht Toomõ Triin kuts kõiki võrokõisi üles tegemiisin üten lüümä. Rahmani Jani pilt