Minevä nätäl oll’ latsil koolivaheaig. Otsustimi sis perrega tetä üte autoreisi Tšehhimaalõ. Saimi olla kats päivä paiga pääl, a neli päivä tull’ autoga sõita. Mis mi sääl sis näimi?
Odavamb ku meil. Söögipoodin läts’ Tšehhimaal veidemb rahha ku meil. Paar kõrda, ku mi poodin kävemi, pässimi tsipa päält 20eurodsõ arvõga. Mi maal olõs säändse söögikorvi olnu arvada poolõ kallimba. Ja muidogi oll’ õlu otav: poodin sai odavamba ollõ nii poolõ euroga, kõrtsin massõ harilik olu 45 Tšehhi kruuni, miä om tsipa alla katõ euro.
Hulga rahvast. Kävemi Praha liinan illusioonõ muusõumin, sääl es mahu rahvas õigõlõ kõndmagi. Ka Praha keskliina kuulsa Karli sild oll’ paksult rahvast täüs. Paistus, et koroonat ei pelgä inämb kiäki.
Ilosa kõrda tettü vanaliina. Prahan, Hradec Královén ja Jaroměřin saimi jalota vanaliinu pite. Huulmada sügüsedsest aost elo kei: oll’ inemiisi, oll’ kauplõjit.
Tugi Ukrainalõ. Mitmõl puul olli Tšehhimaal suurõlt välän Ukraina lipu. Ukraina kiil oll’ kah näütüses pangaautomaadin ja McDonaldsi telmismassinan kiili hulgan. A uulidsa pääl ukraina kiilt joht kõrva es nakka. Vinne kiilt külh.
Rahmani Jan,
Uma Lehe päätoimõndaja