Täämbä kõnõlõ ma umast sõbrast, maailma ütest juhtvast bassilauljast Angeri Ainist.
Saimi timäga tutvas vast kuvvõ aasta iist, ku tä Estonian ooperin laulsõ. Perän lätsimi teno ütitsile tutvilõ kuun restoraani õdagust süümä ja trehvsimi kõrvuisi istma. Kai tälle sis alt üles ja ütli: «Kulla Ain, olõmi käünü sinno kullõman ja ma olõ iks mõtõlnu tuud, et kuis kül ütele mehele um hellü antu.»
Ain sai mu pääle peris pahatsõs, et mis mõttõn um antu. Timä muusigaoppaja oll’ algkoolin pallõlnu täl tassamba laulda, et ei tulõ vällä.
Ildampa um meil ette tulnu võimaluisi kuun olla ja kõnõlda üte mehe tiikunnast maailmalava pääle. Ei saa üteldä, et tuujaos annõt ei olõ vaia, a sääl um iks kah paras hulk tüüd. Aini es peetä Eestin kõgõ sobivambas solistis ja tä sai arvo, et ku taht maailman midägi är tetä, tulõ tast är minnä. Tä jõudsõ Viini ja tuujaos, et kohegi jõuda, tegi säidse aastat tüüd. Tüüt hinnäst esilauljas vällä. Tuu andsõ tälle võimalusõ naada vabakutsõlidsõs ja võtta palgalõ agent, kiä naas’ tedä üle ilma promoma.
Täämbädses um väikust Saarõmaa kihlkunna poisist saanu miis, kiä laul tävvest helüst täüssaalilõ New Yorgi Metropolitan Opera lava pääl, ja tälle plaksutõdas kõvva.
Põimukuu keskpaigan astõ Ain kuun katõ muusikuga kolmõl õdagul üles Haanjamehe talon. Oll’ nätä, ku suur au, võimalus ja privileeg um tuu, et sääne miis, kedä vällämaal pääle etendüst uutva fänne hordi, et autogrammi saia, tulõ siiä Haanimaalõ süämlist kontsõrti andma. Ka tan olli kaema tulnu inemise kontsõrdi lõpun õnnõligu, saisõva pistü ja tennäsivä. Vast trehväs’ kaejidõ hulka ka noid, kiä saiva edimäst kõrda lähküst kullõlda, mis um ooperiaaria ja kuis tuud niimuudu esitedäs, et ainukõsõs instrumendis um helü, miä pand terve saali kõlama.
Olõ hindä pään kõgõ mõtõlnu, et tuu, kiä laul ja illo luu, ei olõ kunagi vihanõ inemine. Ja noid õnnõlikkõ kontsõrdikullõjit kaiõn sai ma viil kõrd kinnitüst, et armastus ja ilosalõ esitedü helü pästvä maailma.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.