Kutsik om tark ja abivalmis tegeläne, kellest õigõlõ peremehele või saia paremb sõbõr ku mõni inemine. Tingimus om, et kutsik saa aru, midä timä käest tahetas. Mõnõ aasta peräst saa säändsest kutsikast perekonnan päämine majandaja, kiä õtakilt kõik latsõ ja kana üle lugõ. Tuu om sis timä eluülesannõ ja tä om tuuga väega rahul. Kaugõltki egä inemine umma eluülesannõt ei tunnõ ega tunnista. Kutsik om nigu rahvas: tälle om tähtis, et olõsi peremiis (valitsus?), kelle asjalikku nõudmist kõik kullõsõ. Kutsik ei käänä kunagi umma ütisellu nii pästmätült vussi, nigu tä tihti inemiste man ette tulõ. Latsõ läävä tuu vussikäänet ütiselu mant edimädsel võimalusõl laia ilma. Säält saadõtas posti tiil esä-imä matustõs lilli. Ku häste lätt.
Suur jagu Eestimaa ülembiid om kurtnu: latsi (kutsikiid?) om veidü. Pääle kotust pagõmise om asi tihtipääle ka mõnõ ihuhädä takan. Ja nuu ihuhädä ei olõ sukugi kõik säändse, midä ravitsõs ainult surm.
Väiku kõrvalhüpe tedremängu manu. Mu Antsla kodust oll’ õkva maaparandus üle käünü, aga üte kraaviotsa pääl mängse iks tedre. Kümne aastaga häädü tuu mäng är. Läts’ viil kümme aastat ja… timahava kudrut’ teder täpselt vana kotussõ pääl. Nuu vana kudrutaja olli ilmselt joba parembiide jahimaie pääl, tuuperäst pidi küsümä: kost tuu nuur laulumiis vana püüne üles löüse? Muud tarka mullõ miilde es tulõ kui kaonu Vigala Sassi ütelüs: ku kotus om õigõ, sis ei loe määnegi ihuviga, ütsä kuu peräst sünnüs lats (tetril jo varõmb).
Kas nüüd tedre ja Sass näütsivä juhuslikult ütte suunda? Vaivalt küll. Ma usu, et mii rahval olli kah joba hallil aol nuu kotussõ olõman. Nuu, kon 100 torupilli mitu päivä lõvvassiva ja midä pastori es jõvva är laita. Aga pääle suuri sõtu taastu mii rahvas imeliselt ruttu.
Noid kotussiid tasunu üles otsi ja mõnõ pääl või vast tedremängugi löüdä, aga edesi? Edesi tetäs sinnä euroturiste jaos väiku onnikõne roppkalli piledihinnaga. Eestimaalõ tuu vaivalt et tulu tuu.
Oh sa mu tedrekanakõnõ! Oh sa mu kikkagõnõ! Tii jaos om siin elun kõgõ tähtsämp kõgõ egäpäävätsemp asi. Mis nii viga elädä!
Aga pääle nakkas kõik kutsikast, timä eluülesandõst.
Pulga Jaan