Minevä puulpäävä oll’ võro keele ja kultuuri huviliidsi nuuri kokkosaaminõ Tarto liinan. Ütenkuun käüti Jaani kerikon, kon Kuslapuu Kaisa kõnõl’ hõrilamängmisest ja umast loomingust, ja Tarto Ülikooli luudusmuusõumin, kon Kalla Urmas kõnõl’ näütüsel olõvist eläjist ja näide võrokeelitsist nimmist.

Võro keele ja kultuuri huvilidsõ noorõ omma kokko saanu joba neli kõrda. Varrampa om kokko saad vegankoka Karu Kadriga, käütü muusiku Kalkuna Mari puul ja sepä Reemanni Piitre sepikuan.

Seokõrd tull’ Tartohe kokko kümmekund nuurt. Edimält käüti Jaani kerikon, kon Võrost peri laululuuja ja hõrilamängjä Kuslapuu Kaisa kõnõl’ umast kooliaost ja tuust, kuimuudu tä muusiga mano jõudsõ. Tä julgust’ nuuri otsma umma rata elon ja oll’ kimmäs, et pall’o as’a tan maailman sünnüse juhussidõ abiga. Viil kõnõl’ tä umast bändist Lonitseera (miä tähendäs ladina keeli Kuslapuud) ja tuu vahtsõst albumist «Tapeet». Bänd tege eestikeelist alternatiivpoppi, kon tähtsä omma tihhe tekst ja lainadu tsitaadi. Viil näüdäs’ Kaisa kerigu hõrilat.

Edesi minti Tarto Ülikooli luudusmuusõummi topituisi eläjide näütüsele. Mehikuurmast peri luudusõtundja Kalla Urmas näüdäs’ sääl olõvit eläjit ja kõnõl’ näide võrokeelitsist nimmist. Poolõtõsõ tunni joosul sai kaia ka eläjide luukeresid ja putukidõ herbaariummi.

Kokkosaaminõ oll’ vahva ja jääs miilde. Järgmäne kokkosaaminõ tahetas tetä joba pääle jaanipäivä. Kõik noorõ, kiä omma ütenlüümisest huvitõdu, võiva kirota Vaaba Janekilõ aadrõssi janek.vaab@gmail.com pääle.

Rahmani Elo


Kuslapuu Kaisa näütäs võro keele ja kultuuri huviliidsilõ nuurilõ Tarto Jaani kerigu hõrilat. Vaaba Janeki pilt

Üts lugu tagasi
Järgmäne lugu
Jaga seod artiklit