17. hainakuu pääväl anti Indsikurmun Harmoonika lõõdsapidol 30. kõrda kätte Hurda Jakobi nimeline rahvuskultuuri avvohind. Avvohinnaga tunnustõdas egä aasta kattõ hääd rahvuskultuuri edendäjät.
Timahavva kitse Põlva rahvaharidusõ selts perimüsmuusik Hainsoo Meelikat ja pikkä aigu Karilatsi muusõumi juhatajas olnut Roobi Reeta.
Hainsoo Meelika om uurnu regivärsilist rahvalaulu, laulumängõ ja tuud, kuis noid täämbädsel pääväl ette kanda. Meelika laul ansamblin Lepaseree. 2018. aastagal andsõ tä vällä raamadu «Õnnõkõn siin tsõõrin olla», miä om kokko pant 60 Vana-Võromaa esi paigust peri laulumängust.
Roobi Reet om olnu Põlva talorahvamuusõumi direktri ja juhataja. Tä om juhtnu 20 aastaga joosul mitmidõ aoluuliidsi huunidõ kõrdategemist. Karilatsi muusõumi man om tä avitanu haridusprogrammõ vällä märki ja muusõumi väärt varra alalõ hoita.
UL