Onno Aina

Onno Aina Euruupa Liidu söögiabipakiga. Harju Ülle pilt

«Üts ütsik katõ latsõga naanõ õkva iksõ, ku Euruupa Liidu söögiabipaki kätte sai,» ütel’ Võro toidupanga tüütäjä Onno Aina ja hinnas’, et 16 killo süüki inemise pääle om vaesõmbalõ rahvalõ suurõs abis.

Võro toidupank sai sotsiaalministeeriümi käest kokko 40 tonni Euruupa Liidu söögiapi. Valla omma ummi inemiisi jaos mõtõldu paki joba är otsnu ja lakja jaganu. Võro liina inemise piät pakilõ esi perrä minemä.

«Kõgõ inämb pakkõ läts’ Rõugõ valda – 128 inemisele,» kõnõl’ Onno Aina. «Võro valda läts’ 112 pakki ja Võro liinast saa api nii 300 inemist.»

Et õnnõ Rõugõ valla söögipakkõ oll’ nelä suurõ euro-alussõ jago, sis meelega mõista saa-s sotsiaaltüütäjä söögikraami eelektrimassinaga minemä vitä. «Iks mikrobussi vai peräkäroga tulti,» selet’ Onno Aina.

Tä ütel’, et inemiisi siän, kinkalõ api vaia lätt, om pall’o noid, kiä kasvatasõ ütsindä latsi. Om ka tervüseviaga ja ilma tüüldä inemiisi.

Põlva maakunna inemiisi jaos om söögiapi 23 tonni.

Põlva toidupanga kõrraldaja Numa Kairit ütel’, et Põlvahe jõud tuu mõnõ päävä peräst. Sis lätt viil nätäl aigu pakmisõ pääle ja inemise nakkasõ pakkõ kätte saama seo kuu lõpust.

«Huvi om väega suur – hädäliidsi om Põlva maakunnan hulga,» hinnas’ Numa Kairit.

Euruupa Liidu söögiabi saava toimõtulõgitoetusõ saaja vai toimõtulõgitoetust küsünü ja tuust napilt ilma jäänü inemise (kellel om sissetulõk toimõtulõgipiirist –130 eurot kuun – kooni15% korgõmb). Abipaki saava ka vajahuspõhidsõ perretoetusõ saaja ja var’opaigan üüd olõja.

Toidupank jaga Euruupa Liidu keväjäst söögiapi lehekuu lõpuni. Vahtsõnõ abivuur tulõ sügüse. Vaihõpääl jaga toidupank lakja süüki, mille hää inemise omma Eestin toidupanga jaos ostnu. Eesti söögiabipaki saava inemise kätte egä katõ-kolmõ nädäli takast.

Onno Aina Euruupa Liidu söögiabipakiga.
Harju Ülle pilt

Euruupa Liidu söögiabipakk (16 kg):

Tatrik 2 kg
Nisujahu 1 kg
Manna 1 kg
Riis 1 kg
Rossin 500 g
Rapsiõli 2 l
Tsukru 1 kg
Eläjäliha-konserv 6 tk
Kanaliha-konserv 4 tk
Sproti õlin 4 tk
Purgirassolnik 2 prk
Sokolaat 100 g
Müsli 500 g
Kohv 250 g

Jaga seod artiklit
Share On Facebook
Share On Twitter
Share On Google Plus
Contact us