Märdikuu edimädsel täüsnädälil, timahava sis 6.–12. märdikuul, peetäs võro keele nädälit. Säänest nädälit võtt Võro instituut iist joba 18. aastak.
Võro instituudi direktri Kuuba Rainer seletäs, et timahava omma nädäli kavan innekõkkõ neosama suurõmba as’a, mis ka varrampa omma võro keele nädälil olnu. Inämb umakeelitsit tegemiisi om koolõn, latsiaidun, rahvamaiun ja raamadukogodõn.
A nädälist saa ossa võtta egäüts. «Kutsu üles kõiki asutuisi ja ettevõttit: tekke midägi võro keelen. Sis lätt päiv lõbusambas, miil rõõmsambas, tüü tulõ parõmbalõ vällä,» löüd Kuuba Rainer.
Võro instituudi direktri Kuuba Rainer timahavatsõn Lindora laadun. Rahmani Jani pilt
Võro keele nädälil:
• tegevä tüüd vabatahtligu võro keele agendi 004.
• saa ossa võtta võrokõsõ bingo-mängust.
• egä päivi saava latsõ kullõlda vahtsõt unõjuttu Helüaidast.
• saa läbi tetä savvusannateemalidsõ veebiviktoriini.
• näüdätäs Roosi Reijo vahtsõt eesti- ja võrokeelist luulõkoko.
• tulõ võro keele iistkõnõlõjidõ kokkotulõk Põlvan.
• tetäs vallalõ iistkõnõlõjidõ saržinäütüs (tsehkendänü Kristjan Lume) Võro instituudi saalin.
• tüütäs Võro instituudi keelekohvik.
• saa vällä panda võrokõisi lipu.
• saa kanda võrokõisi rahvarõivit.
• saa kõrralda umahindä võrokeelidse üritüse.
• saa võro keele nädäli päisit ja teedüspõhju tarvita umahindä võrokeelidse üritüse reklaamis.
• omma põnõva tegemise Vana-Võromaa muusõumõn.
• 6.–10.11 omma Võro instituudi saalin jututunni.
• 6.11 nakkas pääle võro keele kõnõlõmisõ kursus Antslan.
• 7.11 kell 17.30 om Võro instituudin võrokiilne ja -miilne mälomäng.
• 7.11 kell 18 om Tarto liinan Jakobi 2 tarõn 103 võro keele kohvik.
• 8.11 kell 13 saias Parksepä raamadukogon kokko Kauksi Ülle ja Riitsaare Evariga.
• 8.11 näüdätäs vagivahtsõt võrokeelist Tähekese nummõrd .
• 9.11 kell 16.30 näütäs Häniläne Võro instituudi saalin umma vahtsõt luulõkokko «Tõsõ mu maailman».
• 9.11 saava latsõ ossa võtta ettelugõmisõ pääväst «Kullõ, ma loe sullõ!».
• 11.11 loetas ette võrokeelitsit raamatit Rahva Raamadu poodin Võrol Kagukeskusõn.
• 11.11 kell 11 toimus Uma Pido tsihiotsmismäng Antslan.
Kae mano: wi.ee
Võrokõsõ välläkutsõ
