Folgirahvas sõit vana bussiga läbi Lõuna-Eesti

Tulõva nädäli lõpun, ​4.–5. lehekuul sõit Lõuna-Eestit pite folgilahvka. Tego om ettevõtmisõga, miä kuts ossa saama timahavadsõst rahvamuusikafestivaalist Mooste Elohelü.

Folgibussin mängitäs 24 tunni järgepiten muusikat. Buss tege ka hulga piätüisi, kon bussirahvaga saava kokko paigapäälidse muusiku. Kiä taht, või kotost uma pilli üten võtta ja folgilahvkan olõjidõga üten mängi vai laulda. Ku bussin om ruumi, om mõnõn piätüsen pääle karanu muusikil võimalik tuuga ka tsipakõsõ üten sõita.

Kõkkõ taad pillimängumaratooni saa internetist kah kaia, folgilahvka tegemiisi kand üle Postimehe portaal.

Buss, minka folgirahvas sõit, om peri Eesti Suurõtiimuusõumist. Tuu om 1942. aastagal Austrian tett Saurer.

Eesti kõgõ vanõmbal sõitval bussil om põnnõv aolugu. Tuu tuudi päält sõta Kuramaalt, anti Villändi autobaasilõ. Bussiga sõidõti Villändi-Tarto vaiht.

Edesi ost’ bussi Vanemuisõ tiatri ja tuuga veeti näütlejit. Sis müüdi buss Võro liina maalridõ brigaadilõ. 2008. aastagast om buss suurõtiimuusõumi uma.

Eesti rahvamuusikatüütlüisi festivaal Mooste Elohelü tulõ timahava 11.–12. lehekuul. Katõl pääväl saa nätä-kullõlda kontsõrtõ, tüütarri ja ütenlaulmiisi Mooste mõisan. Pillimängjile om seo aastak kohustuslik võistluslugu Urvastõ kihlkunnast üles kor’at laul «Lätsi küllä».

Ligembät teedüst folgilahvka ja festivaali kotsilõ saa kodolehe moostefolk.ee päält.

Rahmani Jan


Suurõtiimuusõumi buss Saurer, minka folgirahvas sõit. Laube Kadri pilt

Folgirahvas sõit vana bussiga läbi Lõuna-Eesti2018-04-24T12:40:51+03:00

Näütemängupäiv Puigal

Joba 18 aastakka saava ütel keväjäpääväl Võro küle all Puigal kokko latsõ, kiä mängvä võrokeelitsit näütemängõ. Tuuperäst võigi üteldä, et minevä riidi Puigal peetü näütemängupäiv jõudsõ täüsikkä.

Näütemängõ mängiti katõn jaon ja paigan: latsiaialatsõ Puiga latsiaian ja koolilatsõ koolimajan. Latsiaian sai nätä kuut näütemängu ja sama pall’o tükke jõudsõ koolilava pääle.

Latsiaialatsi mängun oll’ tunda lustiga tegemist. Mängidü tükü es olõ väega lihtsä, tegeläisi oll’ hulga ja pia egän tükün oll’ ka uma laulu- vai tandsunummõr. Sõmmõrpalo latsõ tei kogoni pupitiatrit. Võro kiil tull’ latsil väega häste vällä, määnestki kangutamist külh kuulda es olõ. Puigalõ olli kokko sõitnu latsiaialatsõ Võrolt, Põlvast ja Sõmmõrpalost, Puiga latsõ esi kah asti muidogi üles.

Koolilatsi näütemängupäiv Puiga kooli saalin tõi kokko koolilatsõ Puigalt, Mõnistõst, Harglõst ja Oravilt. Mängidü tükü olli pikembä ja nätä sai ka küländ tõsist ja mõtlõmapandvat tiatrit. Ja miä kõgõ tähtsämb: ka koolilatsi mängmine es paistu kuigi pingutõt, innembi sai iks tunda tegemise rõõmu.

Näütemängupäivä kõik naa aasta vidänü Ruuli Helve võtt 18 aasta joosul nättü kokko niimuudu: «Om olnu väega pall’o truppõ, om väega pall’o huvitavit näütemängõ tettü kooni muusikalini vällä. Om olnu ka tagasilüüke, a alla viie trupi ei olõ mi näütemängupääväl kunagi üles astnu.»

Õnnõ ja jõudu täüsikkä jõudnulõ Puiga näütemängupääväle!

Rahmani Jan


Harglõ põhikooli tükün «Liinaminek» sai nätä tiatrilõ umast tülütsemist ja kavalust, a kõik lõppi iks ilostõ ja lauluga. Pildi pääl Hermlini Birgit, Rätsepä Kadri ja Mažorovi Siiri. Rahmani Jani pilt


Näütemängupäiv latsiaian. Põlva latsiaia Pihlapuu Vanderselle rühm mäng näütemängu «Klaasist sild ja kassikõnõ». Rahmani Jani pilt

Näütemängupäiv Puigal2018-04-24T12:39:11+03:00
Go to Top