Adsoni ilolugõmisvõistlus tulõ 10. lehekuul Sännän

Võrokeelist latsi ilolugõmist kuuld timahavva Sännä mõisan 10. lehekuu pääväl (10.05) algusõga kell 12. Võistlusõlõ om aigu kirja panda 4. lehekuu pääväni. Latsi lugõmist omma oodõdu kaema ja kullõma kõik huvilidsõ.

18. Adsoni Arturi nimelidsele luulõlugõmisvõistlusõlõ oodõtas latsi tsill’okõisist nikagu gümnasisteni. Lugõjidõ hindaminõ käü nellän vannusõrühmän: latsiaid – I klass, II–IV, V–IX, X–XII klass.

Egä kooli vai latsiaia lugõja kand ette üte pala – Adsoni Arturi luulõtusõ vai mõnõ tõõsõ kirotaja võrokiilse luulõtusõ. Lugõmisõ pikkus ei või olla üle nelä minodi.

Egäst latsiaiast vai koolist oodõtas ekkä vannusõrühmä ütte ütsikut esinejät vai kooni nelä liikmõga rühmä. Ütest koolist vai latsiaiast ei saa võistlusõlõ tulla mitu üte vannusõrühmä kavva.

Ossavõtust pallõsõ kõrraldaja teedä anda Võro Instituuti (tel 782 8753, 5691 6281 vai tiia.allas@wi.ee pääle nika ku 4.05.2018). Teedä tulõssi anda lugõja nimi, vannus, klass ja kuul/latsiaid ni oppaja nimi, luulõtusõ vai pala päälkiri ja kirotaja.

Edimäne luulõlugõmisvõistlus peeti Sännän, Adsoni latsõpõlvõkülän, 1999. aastagal luulõtaja 110. sünnüaastapäävä avvus.

Võistlust kõrraldasõ MTÜ Sänna Mõisakeskus ja Võro Instituut, tugõ MTÜ Sänna Kultuurimõis.

Võro Instituut

Adsoni ilolugõmisvõistlus tulõ 10. lehekuul Sännän2018-04-10T14:01:10+03:00

Maakunna vahtsõ meelüsse

Mustikidõga käsitüüsokolaadi Võromaa noorõ kunstnigu piltõga karbõn. Rahmani Jani pilt

Rahvarõivamustriga torosalli ja käsitüüsokolaat mustikidõga – säändse meelüsse valiti Võro maakunna meelüssekonkursi parõmbis. Meelüs vai suvõniir om väiku kingitüs vai nipsasi, miä avitas kaeman käütüt paika meelen hoita.

Võromaa arõnduskeskusõ konkursil valiti maakunna esindüsmeelüsses langast koet rahvarõivakirjuga torosall. Tuu esit’ konkursilõ Latserusõ Riine. Torosall om perämäidsil aastil mooduasi, tuud saa panda kaala sallis, päähä mütsüs ja näo ette maskis kah.

Turistimeelüsses valiti mustikidõga käsitüüsokolaat, miä om karbi seen, kon pääl noorõ Võromaa kunstnigu pildi. Sokolaadi om tennü Roosiku OÜ, kujondusõn om tarvitõt noorõ kunstnigu Meldre Noora joonistuisi.

Eräpreemiä sai konkursil Võro Kreutzwaldi kooli minifirma RaKS tett pihlõpuust hunn, midä saa keeruta, nigu luuhunni, a ku tsusada keskele mulku üts pulk, saa tedä tarvita ka ku näpuhunni (spinnerit). Hunni matõrjaalis om tarvitõt Vällämäel mahamurdunut pihlõpuud.

Rahmani Jan


Rahvarõivamustriga torosalli. Rahmani Jani pilt


Pihlõpuust hunn käü Võromaa sümboolikaga kotti. Rahmani Jani pilt

Maakunna vahtsõ meelüsse2018-04-10T13:59:51+03:00
Go to Top