MTÜ Vana-Võromaa Käsitüü om vällä hõiganu vahtsidõ kaupu ja meelüsside luumisõ konkursi «Mõtsa poolõ». Ettevõtmisõga tahetas mano saia käsitüükaupu ja meelüssit, miä omma härgütüsmõttõ saanu mõtsast, näütäse vällä Vana-Võromaa ummamuudu olõmist, omma elämisen tarvilidsõ as’a vai hoitva meele rõõmsa.

Eestläse ja võrokõsõ näide hulgan hoitva uman hengen iks mõtsa poolõ. Ammust saani om mõts maarahvast ravitsõnu ja avitanu, võtnu paossilõ ni kaitsnu. Vanõmbal aol om mõts tähendänü kõkkõ puiõga vai puiõlda maad, mis jääs kodo vai talo lähiksest kavvõmbalõ. Mõts või olla ettearvamalda ja salanõ, ku sa tedä ei tunnõ. Mõts and nii kirju ku värme ja muidoki matõrjali luumisõs. Nii puud ku muud mõtsavarra tulõ pruuki iks sündsähe ja as’aette, mõts om säänest avvu väärt.

Inemise kotsilõ, kiä kõnõlõs ands’akit vai uskmalda juttõ ni eläs tõistmuudu, om üteldü, et tä om ladvaga mõtsa poolõ. Täämbäsel pääväl peetäs mõtsa poolõ mõtlõmist iks rohkõmb hääs ku hädäs, üldäs, et seo om «kastist vällä» mõtlõminõ, miä vii ello edesi. No ku kokko saava edevanõmbidõ elotarkus, käsitüümõistminõ ni tõsõ nuka alt kaeminõ-mõtlõminõ, või peris põnõvit asju vällä tulla.

Eesti Rahvakunsti ja Käsitüü Liit om nimmanu timahavadsõ aasta miihi tettü käsitüü aastas. Konkursiga tahetas Vanal Võromaal seolõ väke ja vunki mano anda ja kutsutas käsitüü tegijit umma luudut ka vällä näütämä.

Konkursilõ oodõtas töid, midä olõ-i varramba vällä näüdät vai joba müümises tett. Tähtsä om märki ka as’a paki pääle, selle et konkursilõ esitedüid asju saa edespiten anda müüki Vana-Võromaa e-puuti Uma Puut, laatu pääle, muusõumipuutõhe vai suvõpuutõhe üle Vana-Võromaa.

Konkurss lõpõs mahlakuu viimätsel pääväl (30.04.2021), parõmba tüü saava selges lehekuu 4. pääväl. Konkursi kotsilõ saa täpsämpä teedüst MTÜ Vana-Võromaa Käsitüü Mol’ovihu lehe päält: facebook.com/vanavoromaahandycraft.

Varramba peetüisi käsitüükonkurssõ teema omma olnu savvusann ja «Aigu om!». Säält om sündünü kokko ligi puulsada esisugumast vahtsõt asja, minkast paarkümmend omma saanu mitmõlõ poolõ müüki ja löüdnü ka tenolikkõ ostjit.

Konkursi hääs kõrdaminekis and’ tukõ Eesti Rahvakultuuri Keskus Vana-Võromaa perimüskultuuri meetmest. Käsitüüvõrgustigu edendämisel hoitas olga all Vana-Võromaa arõndusprojektõ toega.

UL


Kunstnik Margna Epp om loonu konkursi jaos tunnuspildi.

Üts lugu tagasi
Järgmäne lugu
Jaga seod artiklit