Sõit uudismaalõ
Mineväl aastasaal käve pall’o noorõ Eestist uudismaal viläkoristusõl abis. Niimuudu kirotõdi lehen. Mis nuuril sai häänaabriligu abi vasta olla. Sai nätä ilma ja inemiisi, tüüga tiini kinä kopka. Joba uudismaalõ minekis anti egäleütele kõrralik rahasumma üten.
Seo pajatus vii lugõja ütte Eesti mereviirsehe väikuhe liina. Uudismaalõ minekis sõitsõ küläpoiss taksoga rajooniliina, et säält Tal’nahe edesi minnä. Säält läts’ uudismaalaidsi rongisõit lõuna poolõ. Taksojuhilõ andsõ poiss 100ruublidsõ. Tuu vaband’, et olõ-i tagasi anda. «Sis sõida ümbre taa posti, nika ku arvõ täüs tiksus,» näüdäs’ laja joonõga küläpoiss latõrnaposti pääle. Taksojuht lei massina vahtsõhe käümä ja naas’ ümbre posti tsiirutama. Tuu paistu är säälsamal uulitsal olõvahe miilidsäjaoskunda. Miilits tull’ vällä ja küsse, midä taa kõik tähendäs. «Kundõ suuv oll’,» selet’ taksojuht.
Kundõ kutsuti jaoskunda. Millest jutt täpselt käve, ei tiiä, a asi lõppi nii, et küläpoiss saadõti ütes üüs kardsakambridõ riigiammõtnigulõ üteldü vägisõnnu iist. Hummogu oll’ rong lännü. Uudismaalõ sõidus saad raha pidi nuur miis tagasi masma – tuu peeti kinni timä traktoristipalgast.