Inne valimiisi

 
Inne valimiisi säetas liina üles reklaamõ, päämidselt kandidaatõ näopiltega. Vahtsõ Eesti riigi algusõn es tiiä inemise väläreklaamist midägi. Vinne aol oll’ kõik hulga lihtsämb. Leht ilmut’ tiidmises su piirkunnan üteainuma kandidaadi ja kotost astõ läbi agitaator, kes karist’, et sa iks valima lääsi. Valimisaktiivsus oll’ kõgõ 99,99 protsõnti.

Tan tulõgi juttu vahtsõt muudu valimiisist. Miis maalt tull’ liina velele küllä. Tä es olõ ammu liinan käünü, nüüd oll’ huvi kaia ka laembalt ümbre. Liin olõs nigu noorõmbas lännü. Võiolla tuuperäst, et oll’ jäl aig inne valimiisi. Suuri reklaamitahvlidõ pääl näkk’ miis mitmõl puul kleebitüisi paprõlehti inemiisi näopiltega. «Kes naa säändse ommava?» imeht’ miis. Tä oll’ uma küsümüse kõva helüga vällä ütelnü. Timä man saisma jäänü võõras miis visas’ silmä plakadi pääle ja kostsõ: «Takanotsitava kur’ategijä.»

Maamiis olõs viil tahtnu tiidä, mille näid nii pall’o om, a ütlejä oll’ kavvõmbalõ kõndnu. «Liinan omgi kõkkõ rohkõmb,» arot’ miis tuupääle umaette edesi.

Üts lugu tagasi
Järgmäne lugu
Jaga seod artiklit