Tanki valvman
Narva tangi ärviimine tuu miilde, et ka meil Võru küle all Kosõl oll’ aastil 1979–1991 postamendi pääl tank. Meil läts’ tangi maahavõtminõ kipõstõ ja tuu lasti peräkõrd Aegviidu polügooni pääl oppuisi käügin purus.
A ku oll’ viil suur Nõvvukogudõ aig, oll’ tank vahepääl iks nigu paiklik kaemist väärt asi. Sääl man käüti sõaga köüdetüil tähtpäivil kõnnit pidämän ja lilli tooman. Ku Võro kanti tulli külälise tõisist liiduvabariikest, sis viidi nuu kah kõgõ tanki kaema. Ka osa nuurpaari kävevä pulmapääväl tangi man pilti tegemän. Kimmäle om mõnõlgi sääne pilt viil albumin. Monumenti kutsuti ka eestikeelitsen jutun vinnekeelidse sõnaga: paamjatnik.
Ku vahtsõ tuulõ joba tassakõistõ puhkma naksi, es hoia ka vigurimehe hinnäst tangi mant kõrvalõ. Ütskõrd oll’ tangi küle pääle värviga sinimustvalgõ lipp tsehkendet. Tuuga vihastõdi parteikomitee vällä ja tanki naati valvma.
Ütele parteikomitee instruktorilõ lõppi tangi man valvminõ halvastõ. Tä mõtõl’ õdagu, et pikk üü iin, ja võtsõ valvmisõ mano pudõli üten. Ku tä hummogu säält tangi alt magamast löüti, es olõ pikkä juttu: miis sai pääväpäält umast ammõtist priis.