Olli uma pere noorõmb lats, veli oll’ 14 aastat vanõmb. Tuuperäst tull’ mul kooni koolini ette hulga ütsindäolõmist. Mõnikõrd sai naabrilatsilõ küllä, a inämbüs aigu tull’ esihindä jaos asju vällä mõtõlda. Või-olla sis ma olli tuuperäst veidükese vihanõ, a täämbä olõ tuu ao üle väega õnnõlik. Sai võimalusõ tegeldä luuvusõga: mõtõlda vällä säändsit tegemiisi, et elo mu ümbre olõs põnnõv.

Misperäst inemise pelgäse ütsindäolõkit? Tuuperäst, et nä omma sis periselt õnnõ esihindäga. Ku kiäki lähkün ämmärdäs vai midägi muud tege, sõs mõtlõmi innekõkkõ tuu tõsõ inemise pääle, et mille tä nii tege. A ütsindä ollõn tulõ mõtõlda õnnõ esihindä tegemiisi pääle.

Täämbä näe ka uman perekunnan, et kõigil om vahepääl vaia ütsindäolõmist. Ütsindä ollõn om võimalus midägi luvva, kirota, oppi vai elo pääle märgota.

Kätte om jõudnu aig, ku suvõ-rabõlõmisõ omma läbi, õdaku omma pikä ja om väega hää olla tunn-kats-kolm kündlevalgusõn. Tuu ao joosul saa, nigu Jüssi Fred ütles, viljeldä mol’otamist ja mittemidägitegemist. Et saia esihinnäst selges. Kõgõ lihtsämb om hinnäst selges saia sis, ku su ümbre ei olõ üttegi segäjät. Künnel palas ja sa olõt kündlega katõkõisi. Kaet toda tuld, toda värelüst ja mõtlõt, et periselt om kõik elo üts värelüs. Ja jõvvat tollõni, et niikavva, ku sa näet tuld, olõt siin ilman olõman. Kooni tuli kistus vai sa esi kistut. Ku esi kistut, või künnel edesi palla: harilikult palaski, ku uma inemise sullõ kündle toova.

Kõik mi olõmanolõminõ ja elo omgi mi esihindä ettekujotus tuust, midä mi hindä ümbre näemi. Meil om hing seen ja tuu hing palas. Ja ku hing är lätt, om asi ütel puul. Mõni uma inemine viil mõnda aigu mäletäs.

Mul hindäl tulõ ka mõni koolipõlvõ- vai noorõpõlvõsõbõr vahel miilde sis, ku tedä inämb ei olõ. Ku sõida müüdä tollõst paigast, kon tä om maamulda pantu. Sis tulõ miilde, et sääne põnnõv tegeläne oll’ kunagi mi hulgan.

***

A ku olõt kõik aig seoilmaaigsõ infomürä seen, Mol’ovihun vai kaet telekat, sis ei olõ sul võimalust ütsindä olla. Ma arva, et tuu ei tii inemist rikkambas, a tege pall’o vaesõmbas.

Pindmaa Aigar

Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.

Üts lugu tagasi
Järgmäne lugu
Jaga seod artiklit