Üts hummok tull’ koton ollõn pääle ummamuudu tunnõ, et täämbä võinu kohegi minnä. Välän oll’ parasjago külm, lumi oll’ parajalõ nii paks, et üle saapaveere es tulõ. Pini jäi kurva näoga kaema, ku lätsi väretist vällä ja kääni hinnäst tuu tii pääle, mis läts’ läbi mõtsa ja üle nurmõ Munamäe poolõ.

Olli tuud tiid tihtsäle autoga sõitnu, a jala kävven näi, ku pall’o rikkust om mu ümbre. Ku pall’o jälgi, midä ma harilikult ei näe, ku lummõ maan ei olõ. Kits, põdõr, jänes, repän olli lännü, harak oll’ kõndnu, mõtsavahe oll’ triiki jälgi täüs.

Tuu kõndmisõ pääl tull’ miilde, kuis kunagi sai käütüs Camino de Santiago palvõrännäku tiid. Mõtli, kuis üts tii või inemist avita. Astut sammu ja egä sammuga jõvvat hindä seen esihindäle lähembäle. Toda tiid käü aastan üle 100 000 inemise. Ku sääl tõnõkõrd jäät mõnõ kivisaina mano istma vai märgotama vai saapapaila kinni pandma, sis näet, ku pall’o sa olõt noist maaha jäänü, kes sukka üten tulliva, ja vahtsõ inemise omma vahepääl perrä tulnu. Sääl saat arvo, ku pall’o sa piät pingutama tuu jaos, et tõisiga sammu pitä.

Käve tuud tiid üte lähkü inemisega. Lepsemi kokko, et panõmi hinnäst viil rohkõmb proovilõ. Jalotimi üte päävä niimuudu, et ütel olli silmä kinni köüdetü ja tõnõ oll’ timä käe kõrval. Tuu, kel silmä kinni, pidi usaldama nägijät. A meil oll’ ka sääne kokkolepe, et kõnõlda võidsõ õnnõ tuu, kes es näe.

Ma või täämbä kül üteldä, et tuu päävä suurõlt jaolt vakkaolõmisõ aol kävemi umavahel läbi kõvastõ inämb ku sis, ku saimi kõnõlda. Tuu päiv olli tõsõ meele pall’o aktiivsõmba ja es jää mi koskil nälgä ega olõ es muud hätä. Hää oll’ olla.

Ka seo Munamäele minek tulõt’ mullõ miilde elotsihi: mi olõmi egä päiv kõndman umma tiid, kon mi trehvämi eläjit mõtsan ja inemiisi, kes meile tii pääl vasta tulõva. Noilõ, kiä tii pääl vasta tulõva, ütlemi rõõmsalõ tere ja tunnõmi häädmiilt tuust, et tuu elläi vai inemine om olõman.

Om olnu suur rõõm siiä ilma sündüdä ja seod palvõrännü tiid kävvü.

Pindmaa Aigar

Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.

Üts lugu tagasi
Järgmäne lugu
Jaga seod artiklit