29. ja 30. hainakuul mängitäs Osolan Harjumäe laululava pääl Eesti näütejuhtõ liidu suvõlavastust «Pühajõe legend». Näütemäng om tett Kallasõ Aino sama nimega jutustusõ perrä. Lavastaja-mentor om Tagamõtsa Tarmo.
Minevä aastak 25 aasta juubõlit pidänü Eesti näütejuhtõ liit tege joba tõist kõrda uma suvõkooli lavastust Võromaal. Seokõrdnõ tiatritükk kõnõlõs Pühäjõõ legendist. Ka varrampa om Harjumäel Pühäjõõ legendi lava pääle tuudu, a timahava proovitas tuud tetä tõsõ küle alt.
«Seokõrd mi ei tii tiatrit traditsioonilidsõlt, a teemi rohkõmp säändse füüsilidse ja helülidse poolõ päält. Sõnnu om veidemp ja liikmist ja tunnõt rohkõmp,» seletäs lavastaja Tagamõtsa Tarmo. Viil tarvitõdas lavastusõ tegemisel luudusliidsi matõrjaalõ, miä tegevä hellü ja kõnõlõsõ tiatritüküle viil uma luu manu.
Suvõlavastusõ projektijuhti Möldri Tuulikõist mõotas joba varõmp mängitüt luku vahtsõlõ tegemä ka päälekasunu põlvkund. «Latsõ kasussõ ja kuna tuu om seo paiga perimüs, sis omgi tedä vaia aig-aolt vahtsõst tetä,» seletäs tä.
Tükün mängvä Eesti näütejuhtõ tiatritrupi liikmõ, kiä omma tulnu kokko üle Eesti, ja Osola põhikooli opilasõ. Et inemise omma kokko tulnu esi piirkunnõst, saa tükün kuulda võro, saarõ ja eesti kiilt. Tagamõtsa Tarmolõ sääne inemiisi kirivüs väega miildüs. «Mullõ hindäle miildüs, ku omma vahtsõ inemise, kellest ma piaaigu midägi ei tiiä. Tuu and võimalusõ inemiisiga kõgõpäält tutvas saia ja sõs ütstõõsõ mõttõilma laembas muuta.»
Etendüse nakkasõ puulpäävä ja pühapäävä õdaku kell 22. Teedüst saa Eesti näütejuhtõ liidu Näoraamadu lehe päält.
Rahmani Elo
Etendüspaiga ehitämine näütlejide ja lavastaja Tagamõtsa Tarmoga. Rahmani Elo pilt