Üts eelevant ähvärdäs Võromaa portsõlanipuuti sisse marssi. Tuu om Nursipalo sõavälä laembastegemine. Plaan om tegünü küländ äkki ja varguisi, nii et väega selget tiidmist, miä sündümä nakkas, viil ei olõ. Täämbädses om küläjuttõ asõmõlõ tulnu kaart, kost nätä, määndse maa plaanidu sõavälä ala jääse. Tuu ei olõ suurt midägi selgembäs tennü.
Parhilladsõ tiidmise perrä om selge õnnõ üts: 21 majapidämist piät sõahar’otuisi iist kohegi muialõ kolima. A säändsen mahun har’otusvälä plaanminõ nõst üles hulga laembit küsümüisi, minkalõ paigapäälidse inemise, umavalitsusõ ja arõndusasotusõ piät vastussit otsma. Kuimuudu mõotasõ plaani turismipiirkunda Rõugõt? Kas Võro liinan saa ellä, ku egä päiv kostus kõrvu kõva paugutaminõ? Ku pall’o om noid inemiisi ja ettevõtmiisi, kink egäpäävätsit tegemiisi kõvõmba sõahar’otamisõ kõvastõ segämä nakkasõ? Kuimuudu mõos sääne paugutaminõ kesk Võromaad võrokõisi hindätiidmisele, võro keelele ja kultuurilõ? Midä tuu tege luudusõ ja rahulidsõ elo poolõst tunnõdu Võromaa kuulsusõlõ? Kuis pidävä vasta inemiisi, kodo- ja mõtsaeläjide närvi? Küsümüisi om kimmäle viil hulga.
Varrampa om umavalitsuisi klaashelmidega (loe: mõnõ paiga uulidsavalgustusõga) är ostõtu, et inemise paugutamisõ välläkannatamisõ iist midägi vasta saanu. Kas ka seokõrd loodõtas klaashelmide pääle?
Rahmani Jan,
Uma Lehe päätoimõndaja