Pildikeisi Ameerigamaa reisi päält

Plaansõmi 2020. aastaga mahlakuun perrega üte Ameerigamaa reisi ette võtta. A koroona tull’ vaihõlõ. No kats aastakka ildampa saimi reisi siski tettüs: ollimi nädälikese New Yorgi ja New Jersey osariigin. Tan sis mõnõ tähelepandmisõ.

Säänesama elo. Või üteldä, et elo Ameerigamaal ja Eestimaal om inämb-vähämb säänesama. Tiiä-i, kas omma ameeriklasõ mi muudu elämä naanu vai sis om vastapite.

New York. Tuu om küländ suur liin, kost juusk läbi jõgi ja kon kesken om suur park. Umbõs nigu meil Vahtsõliina, a hulga suurõmb. Kõndsõmi liina pääl, rahvast oll’ kül hulga, a Vahtsõliinan om laada aigu tsurmminõ suurõmb. Nii et näil om viil, kohe edesi minnä.

Süük. Ameeriklasõ söövä pall’o saia. Tuuga om meil, leeväsüüjil, peris rassõ är harinõda. A süvväs ka muud, näütüses lihha. Ütekõrra veivä ameeriklasõ meid Jaapani restoraani, kon kokk mi nõna all söögi valmis tekk’. Lihha mõistsõ tä uma pliidiravva pääl häste kütsä.

Kirivüs. Ameeriklasilõ paistusõ miildüvät kirivä as’a. Tuud kirivüst saa nätä poodin ja uulitsa pääl. Meid viidi ütte latsilõ mõtõldulõ mängupõrgulõ, kon kirivide massinidõ pääl sai kõvastõ rahha maaha mängi.

Jalaga käümine. Ku New Yorgi liin vällä jättä, sis jalaga kävvü Ameerigamaal suurt es saa. Poodi omma näil kah niimuudu tettü, et üte iist tõõsõ ette tulõ autoga sõita, kuigi nä omma tõõnõtõõsõlõ küländ lähkül. Kõndmisõ teid om veidü ja nuu lõpõsõ mõnikõrd äkki kesk võssu är.

Mõts. Põh’a puul, kohe meid üüpääväs viidi, näimi peris kõrralikku mõtsa. Puu omma sääl tõistmuudu: om kolmõ sorti pedäjit, musta kõo ja tammõpuu. Ameeriklasõ sõitva mõtsan ATVga, pidävä sääl jahti, käävä mõtsa püssälaskmist har’otama. Ku mõni puu tuulõga maaha satas, sis inämbüisi jäetäs tuu sinnäsamma maaha. Niipall’o ku vaia, tetäs küttepuiõs, a puiõga kütetäs küländ veidü. Ku kallimba tammõpuu parras kasusõ, raotas nuu mõtsast vällä niimuudu, et ülejäänü mõts alalõ püsünü. Mõnõn paigan kasus säändse «huuldamada» mõtsa all tikri muudu puhmõ, a luudus om niimuudu säädnü, et puhma mõistva piiri pitä.

Seo nädäli joosul es näe ma üttegi lakõs raotut kotust. Arvada omma ameeriklasõ nii pikkä aigu vaba rahvas olnu, et ei pelgä mõtsa käestvõtmist ja ei taha tuud kipõstõ rahas tetä. Nii om näil võimalus ka kõik järgmädse aastakümne umast mõtsast rõõmu tunda.

Rahmani Jan

New Yorgi kesken om Central Park, kon inemise käävä puhkaman ja lumpõ pääl tsuklõvit partsõ kaeman. Rahmani Elo pilt

Mõtsaalonõ New Yorgi osariigin. Tan sõidõtas ATV-ga, peetäs jahti, kullõldas tsirgulaulu ja tundas mõtsarikkusõst mõnno. Rahmani Elo pilt

Uma Lehe toimõndaja suurõn New Yorgi liinan. Rahmani Elo pilt