Ütel ilosal süküskuu pääväl lätsi Põlva Pihlapuu latsiaia Vanderselli ja Sipsigu rühmä kuvvõaastadsõ latsõ kardokit võtma. Sõidimi bussiga Tännässilmä küllä Vigla tallo. Meil olli pangi kah üten – kel «Hello Kitty» vai «Spiderman» küle pääl.
Pererahvas võtt’ meid lahkõlõ vasta. Talon oll’ pall’o kaemist, põnõvit massinit ja eläjit. A saa es pikält ümbre vahti, tüü tahtsõ tegemist.
Kõndsõmi nurmõ viirde ja tull’gi joba peremiis traktoriga. Traktor ai edimädse virkse valla ja latsõ joosiva kardokit korjama. Pangi saiva kipõlt täüs. Oppaja aviti kardokit kotti valla.
Kuus virgest sai võetus, ku kardokavõtjidõ huug jäi väikumbas. Lepsemi pernaasõga kokko, et võtami viil kats viimäst virgest kah. Viimädse virkse lätsi joosuga! Naksimi huuga nurmõ päält minemä. Mõnõ latsõ saiva pernaasõ käest põrkna kah üten, no kuis sa tühä anomaga kodo läät.
Tarõ mano minnen saimi ümbre kaia ja oll’ pall’o põnõvat: hulga kürvitsit väiku uniku pääl, vahtsit ja vanno massinit, hannõ, kanno ja kikkit. Kitsi ja lammast näimi kah, latsõ söödi näile põrknapäälsit.
Ku kitsil sai kõtt täüs, mõsimi käe puhtas ja lätsimi aiamajja ütenvõetuisi võiuleibu süümä. Kül pääle tüüd oll’ süük makus! Pernaanõ paksõ meile viil kurki ja ubinit.
Pääle süümist saimi moro pääl mängi. Sääl oll’ egäsugutsit ägedit püürhälle, turnmisvärke, hällü ja pall’o rattit. Kats pinni ja kassikõnõ kah tulli mi mano ja lasiva hinnäst ilestä.
Kõik mängsevä ja olliva rõõmsa. Ku buss meile perrä tull’, oll’ hallõ ärki minnä. Pererahvas oll’ abi iist tenolik. Mi tennässimi ilosa päävä iist ja et saimi hääd tetä.
Ütenkuun saa kõik häste tettüs ja om viil lustilinõ kah!
Sabbali Karmen, Kaarsalu Pille, Ehasalu Helle
Ku kardoka üles võetu, saiva latsõ selges, et hulk tege hulga tüüd. Kaarsalu Pille pilt