Halva unõnäo
Ma kuuli raadiost, et maakerä omgi naanu taasperi käümä. Pall’o riigi omma käändnü uma elo tõistpite. Ameeriga lätt viiskümend aastat tagasi ja taht är keeldä naisi õigusõ esi otsusta, kas või aborti tetä. Türkmenistani naasõ või-i inämb määnestki kunstlikku vidinät külge panda, ei küüdsi, ei tisse ega võlssripsmit. Sääl võetas iinkujjo Afganistanist, koh om naisi õiguisiga õkva keskaigu tagasi mintü ja naasõ piät näo peris kinni katma. Muido pandas näide miis vai esä vangimajja.
No kõgõ tuu pääle olõ-i imehtä, et Vinnemaalgi om eloga pia sada aastat tagasi mintü. Täämbä sada aastat tagasi alosti Moskvah pioneeri. Näil oll’ eski uma aoleht Pionerskaja Pravda, mis tähendäs pioniire tõtõ. Parhilla om asõmõlõ tulnu Putinskaja Pravda. Esihindäst om Putini jutt õigõ, õnnõ tä piässi kõkkõ tuud piigli iih esihindäle ütlemä. Mitte et täl om õigus ni ülejäänü maailm saa asjust võlssi arvu. Taa kõik om nigu halv uni, miä ei taha är lõppõ.