Seltskund sanna-huviliidsi sai kokko Võro lähkül Hämsaarõ puhkamistalon 13. piimäkuul õkva inne täüskuud. Märgotõdi, kuimuudu võinu Vanal Võromaal ni Setomaal sanna-aastak nätä olla.
Aastak 2023 om vällä hõigat ku sanna-aastak. Võrokõisilõ om sann väega tähtsä kotus ja sannaga köüdedü tegemise läävä kõrda kõikilõ sannasõprulõ. Mooska talo pernaanõ Veeroja Eda jagi sanna-aastaga kotsilõ teedüst.
Sanna-aastaga idee vällähõikaja ni üts iistkõnõlõja om Maalehe aokiränik Sika Rein. Mõttõga tull’ üten ligi 300 liikmõga Eesti Maaturismi ütisüs. Tegemist om hõisu pääle huu üles võtva ettevõtmisõga – nii et kampa omma oodõdu kõik sannasõbra üle Eesti. Aastaga tegemise saava täpsele sändse, midä ja kuis sannasõbra umast hääst tahtmisõst ni rõõmsast meelest tegevä.
Sanna-aastak kuts ossa võtma egäsugumaidsi sannu – köetägu näid sõs puiõ vai eelektriga, olku nä kas kimmält kotusõ pääle ehitedü vai liikva nii vii ku maa pääl, olku tünnü vai löövi kujoga, olku korsnaga vai ilma.
Sanna-as’an om mi maanukan jo kõgõ midägi nätä-kuulda: Vanal Võromaal omma savvusanna ni sannakombõ korgõn avvun. Arotusõ-tsõõrin kõnõldi peris pall’o ettevõtmisõ-mõttit köüdüssen savvusannuga, a jutus olli ka muu esimuudu mi kandi sanna. Kõgõ esierälidsemb om suur sannatelk, midä Võhandu maratoni kõrraldaja egä aastak võigõlusõ aigu üles pand ja mis lask kõrraga lõunu võtta 75 sannutajal.
Tulõvas aastagas võinu jo kõrraga märki, et ku mi piirkunnan om mõni suurõmb pido vai ettevõtminõ tulõman, sõs olõs hää sinnä ka sannu ni sannakombidõ näütämist mano võtta. Kolm-neli sannasündmüst võinu mi kandin õkva eräle kõrralda ja muidoki või egä sannapere vai sannasõpru seltskund ette võtta mõnõ väikumba tegemise ni tõisilõ kah tuust teedä anda. Arotusõl sündü õigõ hulka mõttit, mis uutva, et kiäki nä üles korjas ja är tege.
Kõik arotusõl vällä hõigadu mõttõ omma lugõmisõs välän kodolehe savvusann.ee pääl. Säälsaman lehe pääl om Veeroja Eda esitlüs sanna-aastaga kotsilõ. Arotusõ käügin sündünü mõttõ omma kõikilõ vabalt kaemisõs ni ütenmõtlõmisõs ja kiä tund, et kirja om pant täpsele tuu, midä tä tetä om tahtnu – sõs võtku ni tekü är!
Vana-Võromaa suidsusannu kuuntüükogo
Hämsaarõ puhkamistalo savvusann.