NASA vahtsõnõ marsikulgur Perseverance (’tsihikimmüs’) sõit Marsi pääl läbi hulga kotussit, minkalõ om peris praktilinõ nime anda, selle et nii om tiidläisil hää kõnõlda, kost määnegi pruuv võeti ja midä löüti. Suurõmbilõ kotussilõ and perän nime rahvidõvaihõlinõ astronoomialiit, a tiidläisil om vaia ka hulga umapantuid nimmi, niisama nigu vanast talumehel ummi nurmi ja hainamaiõ jaos.

Tiimin om tüün ka üts navaho rahva hulgast peri insener Aaron Yazzie. Navaho põlisrahvas USA Kaljumäki küle all ja kosmosõagõntuur NASA omma tennü kokkuleppe, et nime, midä marsikulguri sõitmisõ aigu pandas, omma navaho keelen. Edimält om joba 50 nimme vällä märgit. Kotus, kon marsikulgur maaha tull’ ja sõitu alust’, sai nimes Tséyi, miä om navahokeeline alguperäne nimi uhkõlõ kanjonilõ Arizonan, midä tundas kui Chelly kanjoni rahvusmaastikku.

Navaho kiil om üts parõmbidõ elun püsünü Põh’a-Ameeriga indiaanlaisi kiili. Tuud kõnõlas 170 000 inemist, 120 000 jaos om taa imäkiil. Sõski om keele püsümine suurõn ohun ja navaho rahva president Jonathan Nez ütel’, et Perseverance’i missioon ja Marsi pääl navaho keelen nimmi andminõ piässi nuuri innustama umma kiilt rohkõmb pruukma.

Navaho rahva uma keele legende hulgast kõgõ kuulsamb om seoniaoni peri II ilmasõast, ku USA navaho radisti umavaihõl uman keelen kõnõli, a Saksa luurõ es suta ka keeletiidläisi abiga tuust arvu saia. Esiki numbri, midä teedä taheti, olli perädü rassõ vällä kuulda.

Kraatri, kon kõgõ vahtsõmb marsikulgur parla sõitmist om alustanu, om arvada kunagi olnu viiga järv. Kraatri nimi om võet bosnia keelest ja om meilegi peris häste arvu saia: Jezero kraatri.

CBS-Newsi 12. urbõkuu uudissõ perrä
Saarõ Evar

Üts lugu tagasi
Järgmäne lugu
Jaga seod artiklit