Lehekuu om luudusõ kaitsmisõ kuu. Seol kuul om kombõs anda tunnustust noilõ, kiä omma luudusõ hoitmisõ jaos midägi suurt är tennü. Üts keskkunnaministeeriümi luuduskaitsõ hõpõmärk anti timahava Raudsepä Kalevilõ, kiä toimõndas lihalehmiga Tsirgumäe külän Koiva ja Mustajõõ kokkosaamisõ paigan.

Preemiäst kõnõldõn om Kalevi jutun tunda kerget segähüst: «Üttepite om õks hää miil, ku tähele pandas, a tõisipite, ku nii vanulõ miihile antas, tähendäs tuu ka väikselt nii, et kuulõ, su aig om täüs saanu, aig om kõrvalõ tõmmata,» muigas Raudsepä Kalev.

Preemiä anti Kalevilõ puulluudusliidsi koosluisi huuldamisõ iist. Noid jõõluhtõ om tä ummi eläjidega kõrran hoitnu päält 20 aasta. «Peris huuldaja omma eläjä. Ja inemise. Ülemb piät kah olõma, a seo om iks noidõ inemiisi tüü, kes tuud õga päiv tegevä ja vaiva nägevä.»

Koivakonnu OÜ, midä Raudsepä Kalev vidä, toimõndas nii 600 hektäri maa pääl. Sääl kar’atõdas 300–400 lihäeläjät ja tüüd saa olõnõvalt huuaost kooni 10 inemist. «Kuna mi säändside maiõ pääl naid eläjit piämi, sis tulõ vällä, et mi huuldami ka naid suuri puulluudusliidsi koosluisi. Eks mi teimi tuud ka varõmb, a ku tull’ Euruupa Liit ja tuu iist naati toetust masma, sis läts’ taa asi suurõmbas,» kõnõlõs Kalev.

Kuigi toetusõ tegevä Kalevil majandamisõ võimalikus, pidä suvitsõl aol pallidõ jalguga ringi käüjä ilmaasju pääle märkjä taad kõrda küländ ullis. Parhilla om suurõst luust niimuudu, et kolmas osa timä majandustulust tulõ lihamüügist ja kats kolmandikku toetuisist. «Ma kujuta ka ette, et ku toetusõ är kaosõ, sis om kats võimalust: pall’u lõpõtasõ eläjäpidämise är ja maa jäetas kõrda tegemädä vai piät liha-piimä hind nõsõma kats-kolm kooni viis kõrda, nii nigu peris kulu omma. Seo tõnõ olõs pall’u loogilidsõmb süstem. Ei olõ normaalnõ, et nuu, kellel om mõistlik palk, esieränis ku kaia Lääne-Euruupat, kulutasõ söögi pääle õnnõ 10–15 protsõnti palgast. Ülejäänü raha jääs ull’uisi tegemises.» Tuu, et Eesti om väikene riik, a ku midägi tetä tahat, tulõ tuud väega suurõlt ette võtta, om Kalevi meelest mõistusõvastanõ.

Luudusõjutu mano tagasi tullõn arotas Kalev täämbädse päävä vastasaisu, kon osa tahtva hirmsalõ luudust kaitsa, a tõnõ puul ütles, et om vaia majanduskasvu, pensioni vällä massa jne. «Mõlõmbal poolõl om täämbä-hummõn kaiõn jo õigus ja tollõst tülü omgi. A ku mõtõlda kavvõndalõ ette, sis omma ka mõlõmba poolõ nõun, et mi olõmi ullimuudu taad maakerrä piinanu ja pikält niimuudu edesi minnä ei saa.»
Miä säänest olokõrda lahendanu? «Ku ma toda täpselt tiiäs, sis olõs aig minnu joba ÜRO pääsekretäris panda. A uman egäpääväelun piäs mi iks vähämb raiskama,» om tasaligu helüga kõnõlõva Raudsepä Kalevi väiku retsept.

Rahmani Jan


Raudsepä Kalev ummi lihalehmiga. Rahmani Jani pilt

Üts lugu tagasi
Järgmäne lugu
Jaga seod artiklit