Katõ aasta iist kiroti väikun Võro liinan olnust luulõõdagust. Kiroti tuust, kuis kodotsõn Stedingu kohvikun om õdagut kaema tulnu paarkümmend inemist, ja tuud neläpäävä õdagu. Väiku Võro liina kotsilõ om tuu väega hää. Nuur laulukirotaja laul umalõ inneskidsele oppajalõ, nigu olnu tuu timä armsamb. Mõtlõ, ku illos seo om, ku kiäki sullõ laulu vai luulõtusõ pühendäs.

Sääne asi ei saa minno külh külmäs jättä. Mu puun tuksas jo niisama seo illo takanikva süä. Tuuperäst osta hindäle kodotii pääl lilli. Pundikõsõ nartsisse ja poti amarüllusõurbõga. Külmä peräst kanna näid puun uma süäme ligi. Selge kuuvalgusõ käen kõnni krigisejä lumõ pääl inemiisist tühju rato pite Kapstamäele. Kodo jõudõn ütle lillele tervitüse vahtsõhe kodo jõudmisõ puhul, panõ kündle palama ja nakka kirotama. Kirota nii, nigu miilde om jäänü, et seo võinu pututa ka kinkagi tõõsõ süänd.
Täämbä, kats aastakka ildamba, soovi viil luulõ-, muusiga- ja kõnõlõmisõdakit!

Kirota raamatut «Mu Võro» ja tuuperäst om mul vaia inämb sissekaemiisi taa liina kotsilõ. Soovi, et tan olnu inämb vaimlist tiidlikkust. Kõrralda loenguõdakit-tüütarri tiidligust seksuaalsusõst ja tantrast, kost saa üten praktiliidsi hengämis- ja energiät nõstvit har’otuisi. Kõnõlõmi ka tantrajoogast, tuu om mu sagõhusõ nõstmisõ missioon.
Mul omma tan liinan mõnõ mõttõseldsilidse. A esieränis Võromaa veeremaal, kon saa tandsman kävvü ja umasugutsidõga sannalava pääl ilmaasjo arota. Võhandu jõõ väeliidsi viiri pääl, kon õigõ pia üts väkev sannakombõtäütmine tulõ. Kogokunnan oltas pall’o vabamba, laemba hengelaadiga ku liinan. Usu, et olõ pall’o inemiisi trehvänü ja taha näidega tegemist tetä, et aimu saia, kuis nä toimõndasõ ja mõtlõsõ.

Ku Tamula pääl om õnnõ kats kalamiist ja egäl puul ijätüs, nii et võinu uiskõga liinan ümbre liiku, om rassõ põnõvit jutuseldsiliidsi trehvädä. A «Mu Võro» nimel viä hinnäst näide jahilõ.

Tantraõdagidõ jaos piä muidogi tikutulõga huviliidsi otsma, selle et pall’odõ jaos om tantra hiidütäv. Nigu määnegi esoteerika vai nõiakunst. Ei olõ! Teemi tasalikkõ kotsil olõmisõ har’otuisi ja edendämi meeletundmist, ka sõnnolda, putmalda. Seo om vana ja avvolinõ kunst.

Lumiste Kati

Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.

Üts lugu tagasi
Järgmäne lugu
Jaga seod artiklit