Mullõ om tiatri kõgõ väega miildünü. Noorõn tahtsõ esiki näütlejäs saia, lei tiatri­stuudion üten. Võrol eläden tunnõ tiatrist väega puudust. Lahendus olnu esi midägi iist võtta. Lehekuun oll’ tan impro­tiatri etendüs ja tüütarõ, kon sai mängülisüst ja särtsü üles herätet. A nii om, et suurõst pääst lätt tihtsäle meelest, ku hää om lihtsäle mängi, olla tuu­sama aokibõna seen, tetä nall’a ja ullita. Improtiatri tege seod kõkkõ nii loomuligu moega, et kõrraga avastat, et olõtki hinnäst vallalõ saanu, üten haarõt ja käümä pant.

Improtiatri Ruutu 10 ja peaasi.ee omma naanu kuun vaimsõt tervüst edendämä ja hoitma. Süküskuust omma ka Võrol ja muial Lõunõ-Eestin alostaman improgruppõ juhendajidõ koolitusõ. Nuu impro­grupi omma plaanitu alostama 2024. aastagal. Vaimo­tervüse edendämine om üts tähtsä valdkund mi parhillatsõn aon, ku pia egä viies inemine om põdõnu depressiooni. Inemiisil om keerolinõ ummi ränki tundidõga toimõ tulla, a ma usu, et improtiatri om üts võimalus inemiisi kerge mooduga avita.

Mu meelest om nii sõnalinõ ku kihäline hindä vällä­näütämine üts parõmbit teraapiavormõ ja avitas sisemiidsi välläkutsit vasta võtta, hinnäst parõmbalõ tundma oppi.

Improvisatsiooni ladina­keeline mõistõ and tsihi uutmalda asjolõ, paigapääl sündüväle ette­valmistamada ülesastmisõlõ. Tuu tähendäs, et improvisiirjä kargas kaejidõ iin nigu võõran paigan vette. Improtiatri om etendüse luumisõ viis, kon tekst ja karaktõri sünnüse paiga pääl rahva iin. Harilik tiatri om meile valmis näütämä õnnõ kimmäst tulõmust, valmistettüt lavastust, kon kõik juhuslik om väega harv. Improtiatri artisti võtva lava pääl ka näüte­kiränigu ja lavastaja vastutusõ. Nuu etendüse nõudva artiste käest inämb tähele­pandmist ja keskendümist.

Soovita väega nii Tarto ku Tal’na inemiisile Ruutu 10 vai Impeeriumi stuudio «teraapiaseanssest» ossa võtta. Looda, et õigõ pia saa ka Võromaal improvisiiri. Improvisioon tege vabas. Vahepääl tahtnu lihtsäle laskõ hinnäst luumisõl kanda ja maitsa noid imeliidsi viljo, miä tuust sünnüse.

Lumiste Kati

Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.

Üts lugu tagasi
Järgmäne lugu
Jaga seod artiklit