Haridus- ja tiidüsministeeriüm üten Imäkeele seltsiga omma rahvahääletüsele vällä säädnü 32 mineväaastast keeleteko, mink hulgast valitas vällä aasta keeletego (valiva ütenkuun parhillanõ ja inneskidse haridus- ja tiidüsministri) ja rahvaavvohind (valitas rahvahääletüsega).

Aasta keeleteo konkursi tsihis om kittä keelega köüdetüid tegemiisi. Rahvahääletüs käü kooni 27. radokuu kesküüni, võitja kuulutõdas vällä 16. urbõkuul.

Nigu innegi, või ka seokõrd hääletüsele pantuidõ tekõ siäst löüdä mitu võro keelega köüdetüt tegemist. Näütüses võrokeeline koolimuusikal «Koolin om umbõlõ mõnna», miä jõudsõ minevä aastak püüne pääle. Tego om Contra kirotõdu lustilidsõ luuga täämbädse ao koolinuuri egäpääväelost. Muusika om tennü Rips-Laulu Piret ja mängvä Võro Keskliina kooli noorõ.

Valiku hulgan om ka võrokeeline tiatritükk «Godot’d uutõn», miä etendü 2021. aastaga suvõl Navi külän. Ülessäädjä om kirotanu, et tego om maailmaklassika väärt tõlgõndusõga, miä võro keelen tuu vällä kirändüsteossõ vahtsit nüanssõ.

Üles om säetü ka KUMU näütüse «Talomuro ilmaruum. Lõuna-Eesti luuja» võrokeeline audiogiid. Esitäjä om tuu kotsilõ ütelnü, et võrokeelist audiogiidi tarvitava külälidse jaos om tulõmusõs näütüse tävveste esimuudu elloheränemine inämb ku sada aastakka tagasi Vanal Võromaal üles kasunu kunstnigõ imäkeelen.

Võro keelega köüdet tegemine om ka lõunaeesti kiili tarvitaminõ Tal’na tiatrielon. Juhendaja Lambi Anu om lavakunstikooli opilaisiga toonu opmisõ käügin püüne pääle hulga tarto, võro ja seto kiilt.

Kõigist naist tegemiisist om minevä aastaga joosul juttu olnu ka Uman Lehen. Lisas võrokeelitsile om üles säetü hulga tõisi tegemiisi, näütüses setokeelidse välänopmisõ rühmä vallategemine Verska latsiaian ja mulgi veebisõnaraamat. Täpsempä saa lukõ kodolehe hm.ee/et/keeletegu2021 päält, kon saa ka keeleteko valli.

UL

Üts lugu tagasi
Järgmäne lugu
Jaga seod artiklit