Kangsti küläselts om toimõtanu joba 20 aastat. Üles om ehitet kats küläplatsi. Egä aasta om peetü vähämbält üts-kats küläpitu, tähistedü rahvakallendri tähtpäivi ja egä viie aasta takast kodukandipäivi. Seo aasta suurõmba tegemise olli vastlapäävä, munapühhi tähistämine, jüriüü märgutulõdõ aktsioonist ossavõtminõ, piirkunna jaanipidu ja Matsi krossiraa ja küläseldsi sünnipäivi ütine pidämine jakapääväl.
Aastat alustimi veebruarin ütidse vastlapääva ja vabariigi aastapäävä tähistämisega. Üritüse jaos kirut’ valda projekti Matsi tehnikaspordiklubi, a kuun Kangsti küläseltsiga sai üts põnnõv ja kõrdalännü päiv kõigilõ, keä kohalõ tulli. Koroona peräst olli kül jaanipääväni üritüse veidembä rahvaga.
Kõgõ vägevämb üritüs oll’ Matsi krossiraa ja Kangsti küläseldsi ütidse sünnipäävä pidämise pidu.
Matsi krossiraa edimädsest krossist sai kah 20 aastat ja alustimiki säält. Konvõrentsi tekk’ vallalõ raaumanik Tammemäe Silver, autuspordi aoluust kõnõl’ as’atundja Alliku Kalle, kelle kokku pant ja üles säet pildinäütus «Veoautokross läbi aegade» huvit’ väega pall’usid. Põradsõ ao motospordist pajat’ Eesti autuspordi liidu veoautukomitee esimiis, Tsoorust peri Sibula Erko, keä om olnu ka kõiki krossõ pääkohtunik. Kohalõ oll’ tullu innembädse ao krossimehi, keä saiva vahtsõmba ao krossiauto rooli taadõ, kaemisõs oll’ ägedid krossimassinid, millega tetti kah mõnõ tiiru. Küllä olli tullu «inneskidse müügipreili» Gorki aututehassõst, kel olli laulu sisse pantu oppusõ sõitmisõs ja võitmisõs… Oll’ tegemiisi latsilõ ja suurilõ: ao pääle vahetõdi aututsõõri ja nõstõti ollõkasti, pakuti hääd ja parõmbat.
Säält sõidõti pikän rivin Kangsti küläplatsi pääle, kon tõmmati võrukiilse lipulauluga masti lipp. Tuud tei seltsiga ütevannudsõ 20aastadsõ seo kandi noorõ. Pidu tekk’ vallalõ seldsi iistvidäjä võru keelen. Kuna meil esinejid es olõ võimalik kutsu, sis oll’ joba kuulutusõ pääl kirän, et tervitüse võinu olla säändse, midä kaia vai kullõlda. Ja säändsid püüne päält etteastid ja tervitüisi oll’ hulga: Võru judoklubi Rei, Varstu Hõbõhall, Mõnistõ Mehkari, Tsooru külätiatri, Kriguli talu, naabriküläseldsi Vana-Roosa Wärk ja Matsi tehnikaspordiklubi.
Kangstist peri muusik Kasuka Valju kostit’ meid õks uma ehtsä võru keele ja hinge minevä viiulimänguga, siist ärlännü perre terviti kodukandirahvast, Viitinä kuuridsapüüdjist tull’ äge kamp laulu ja lõõdsamänguga. Sõbõr Reet Tal’nast kõrrald’ piduliidsi vahel virtuaalsõ köüdsevidämise, miä oll’ väega põnnõv ja millele eleti kõvastõ üten.
Opmisreisi
Külälatsilõ ja aktiivsilõ ütenlüüjile oll’ augustin ka üts ütepääväne opmisõ reis: kävemi külän ja saimi tutvas Harjumaa Kosõ valla küläseltsega. Meid võtsõ kinäste vasta Viskla külä, miä sai ka «Aasta 2021 külä» tiitli. Kae kon oll’ meil õks joba keväjä vällävaliminõ, kohe minnä! Saimi pall’u tarkust külämaja kõrdategemises. Viskla ehit’ peris vahtsõ külämaja, a mi nakka kõpitsõma 200 aasta vanust Naadi kõrdsimajja.
Viil kävemi Tal’nan, ildaaigu valla tettün Proto avastamisõ tehasõn, kon om nii pall’u põnõvat, et noorõmba võinu sääl olla kasvai kats päivä. Kõik jäivä väega rahulõ, ettevõtminõ oll’ toda väärt.
Küläpillimiihi päiv ja talgupäävä
Mi küläseldsi kõrralda oll’ seo aasta ka Oravalt algusõ saanu 15. küläpillimiihi päiv. Seo oll’ plaanitu veitümbäle rahvalõ, a kohal oll’ õks üle 20 pillimehe. Ka sääl laulti võrukiilsid laulõ ja esitedi siistkandist peri pillilugusid.
Suvõ joosul sai ka kolm talust peetus: inne sünnüpääväpitu sai kemmergulõ vahtsõnõ katus, jäl tenu hääle avitajalõ, paika pantus platsi vallategemises kingit grillivärk ja üles pantus lahkidõ mi kandi ettevõtjidõ ja inemiisi annõtõdu raha iist hangitu lipumast. Tõnõ talus oll’ külämaja ja ümbrekunna kraamminõ. Viimäne talus oll’ minevä kuu, kon sai ka hulga tüüd är tettüs. Küläplats sai tammõlehist puhtas riibutus, et lehe talvõl mi ilusat murru är es lämmätnü. Tulõvadsõ külämaja tarõpääline sai prahist puhtas ja kokkusadanu pliidi, truuba ja ahumatõrjal majast vällä veetüs. Nigu õks, ka ütine talgusupi ja munakoogi süümine ja tulõvikuplaanõ pidämine.
Seo aasta om plaanin viil küläplats jõulus är ehti ja jõuluaigu tähistä.
Ummi tegemiisi tugõmisõs olõmi projekte kirutanu ka muialõ. Paar projekti olõ ei saanu tukõ ja üts om põra oodussilõ. Kõik õks tuu jaos, et mi kandi rahva olõmist praavita ja maal elämist väärtüstä. Olõmi arvu saanu, et ütine tegemine lätt vägevämbäs egä aastaga. Aitüma tugõjilõ, ütenkuun jõvvami pall’u tetä!
Visseli Malle
Seosuvinõ Matsi krossiraa ja Kangsti küläseldsi ütidse sünnüpäävä pidämise pidu.