Timahavadsõ Uma Lehe jutuvõistlusõ tähtaig oll’ 20. märdikuu päiv. Võistlusõlõ saadõti 81 juttu, kirotajit oll’ 45. Parhilla omma jutu hindamiskogo käen, kokkovõtõ ja preemiäsaaja trükitäs är järgmädsen Uman Lehen.
Ku muido om egä aastak jutuvõistlusõ kokkovõtmisõ puhul tettü kirotajidõ kokkosaaminõ, sis timahava jääs seo pido koroona peräst är. Avvuhinna saadõtas kirotajilõ postiga vai tuu toimõndaja esi kohalõ.
Suur jago timahavadsõlõ jutuvõistlusõlõ saadõtuist juttõst trükitäs Uman Lehen är 2021. aastaga joosul. Seokõrd oll’ vällä pakut neli jututeemat, kõgõ inämb saadõti periselt elon ette tulnuid nal’akit vai tõsitsit juttõ. Kõgõ rohkõmb kirotõdi eläjist, esieräliidsist inemiisist, oll’ ka mälehtüisi latsõpõlvõst. Võistlusõlõ saadõti ka vällämõtõlduid juttõ ja unõnägosid. Teema «Kaika Laine man» härgüt’ kirotajit kirotama umist kogõmuisist ravitsõjidõ ja selgeltnägijidega, ka noid juttõ tull’ paras hulk. Viil kirotõdi juttõ külgenakkajist tõpist, miä inemiisil elo joosul ette omma tulnu.
Uma Lehe jutuvõistlust peeti joba 17. kõrd. Aastit om jutuvõistlusõ kõrraldamisõ man üten löönü ka Eesti Rahvaluulõ Arhiiv.
Suur-suur aituma kõigilõ jutusaatjilõ!
Rahmani Jan, Uma Lehe päätoimõndaja