Iistkõnõlõja Õkva Margit
«Piät jo ummõtõ olõman olõma sääne umakeeline sõna, mis tuu võõra kumoga sõna vällä vahetas. Ku tedä eräle ei olõ, no sis piät tä koskil tõsõ sõna seeh var’ol olõma,» löüd Õkva Margit.
Nii kuts tä kõiki üles söögitegemise oppusõ kotsilõ käüvät umakeelist sõnna üles löüdmä. Päält retsepti-sõna või vällä pakku ka lõugahuisi, minka olõs hää umma sissetettüt kraami reklaami. Õkva Margit löüd, et säändse lõugahusõ võiva mõnikõrd esi päähä tulla. Näütüses sai täl tettüs hulga kürvitsä-tsitronisahvti ja lõugahus tull’ kah nigu niuhti:
kürvits vinne keelen tõkva,
hüvä sahvti saa tast õkva!
«Kutsu kõiki üles säänest lühkeist ja vigurilist lõugahust vällä mõtlõma. Kats kooni kuus rita om küländ,» löüd seo kuu võro keele iistkõnõlõja.
Uma sõna ja lõugahusõ pallõldas saata 4. süküskuu pääväs aadrõsi wi@wi.ee pääle.
UL