Päälkiri olõsi nigu Lenini käest lainatu, aga sisu om tõnõ. Põllumiist ei saa määndselgi juhul võrrõlda proletariaadiga. Kui väega tahta võrrõlda, sis vast proletariaati korrusmajadõ elänikkõga, kel ei olõ muud kaota kui uma korter. (Proletariaadil olli ahila.)

Aga asja manu. Minev­aastast silo jäi põllumeestel hulga üle. Timahava nii mõnigi miis eriti silo tegemä ei torma, vana viil kõlbas. Säälsaman aga aias Brüsselin tuud juttu, et põllu­maa pinda tulõ vähändä ja pakutas peris suuri protsente, pall’u vähändä.

Esihindäst nõsõs küsimus: mis tuu maaga tetäs? Jummal taivan näge, et söödäkultuure ala tuud panda ei saa, kodutõpra ei jõvva rohkõmb süüä. Mõnõ partei, eriti rohilise, nõudva, et tõpriid tulõ kah vähändä, nuu laskõv pussu. Vähä­nenü omma nimä joba niigi küländ pall’u. Paistus, et tõpriide arvu ja söödäkultuure pinda kiäki umavahel klapma pandma ei nakka.

Mis meil sis üle jääs? Siin tulõgi mängu kats taktikat. Edimäne: saata Brüsseli ammõtniku pehme kotusõ pääle. Mitte et näide praegunõ kotus pehme ei olõsi, aga viil pehmembäle. Tuu nõud ütsjagu julgust ja ütsmiil om kah tähtsä.

Tõnõ: tetä süä kõvas ja naada põllumaa pääle mõtsa istutama. Kui tuud asja mõistusõ perrä aia, ei pruugi kahju väega suur olla. Pall’u om säändsiid maatükke, mia omma:

a) ülearu väikse seo ilma suuri massinidõ jaos, b) maaparandusõ puult är raisatu, nii et midägi suurt ei kasu, c) arulda harimise ja väetämisega är rikutu. Ka mürkega. Mõistusõga valitu ja istutõdu mõtsa­kultuur vast parandas asja.

Mul om seo riigikõrra aigu istutõt umbõs 5 hektärit mõtsa põllumaa pääle. Ei olõ sukugi nii, et mõts saa valmis 60 aasta peräst. Ma looda uman elun viil hindä istutõt mõtsast mõnõ palgigi kodu tuua.

Lugu om kehv, aga mitte lootu­sõlda. Viimätse ao Lõuna-­Eesti praktika om näüdänü, et korilusõst om kah võimalik är ellä. Olõs aga mõtsu, kost korjada. Mõtsu istutamine aga om mii hindä käen.

Kõgõ suurõmb lohutus om tuu, et Kristus om ülnü: tasasõ perivä Maa. Nii et nuu pehme kotusõ pääle saatja häöse är ja kõik maa saa tasatsiile, kiä puulsalaja põllumaa pääle mõtsa istutasõ.

Olkõ sis tassa ja muutkui istu­tagõ nohinal!

Pulga Jaan

Üts lugu tagasi
Järgmäne lugu
Jaga seod artiklit