Vabariigi aastapäivä tähistedi mitmõl puul pidoliidsi kontsõrtõga. Savõrna küläkeskusõ saalin sai minevä pühäpäävä kuulda vaeldumiisi miihilaulu ja lõõdsamängu.

Eesti Vabariigi 104. aastapääväle pühendedül kontsõrdil Savõrna küläkeskusõ saalin asti üles Lasva miihikuur ja Tartese Heino perreansambli. Mõlõmba esinejä tulli püüne pääle kats kõrda, nii sai vaeldumiisi kullõlda vägevät miihikoorilaulu ja kõrralikku lõõdsamängu.

Lasva miihikoori kava pandsõ väiku saali paiguldõ esiki rappuma. Kõgõ inämb oll’ kavan Tormisõ ja Ritsingu loomingut. Seokõrdsõ kontsõrdi võrokeelitses laulus olli Lasva mehe valinu küländ pääväkajalidsõ luu «Ei olõ rahha».

Tartese Heino perreansambli mängse kolmõ lõõtspilli pääl rahvalikkõ laulõ. Lõõdsapallost tull’ kõgõ inämb ettekandmisõlõ Kikka Karla lukõ. Kontsõrdi lõpuluus olli Tartese valinu Kõiva Inda laulu «Mu latsõpõlvõ Võrumaa», midä kõik rahvas üten laul’.

Seokõrdnõ kontsõrt trehväs’ piä ütele aolõ Savõrna täämbädse ao kõgõ tunnõtumba kultuuritegeläse Tartese Heino 70. sünnüpääväga. Tuuperäst olli mitmõl kullõjal ka lilli üten, et juubilaarilõ õnnõ suuvi.

Pall’o õnnõ lõõdsakultuuri väsümäldä elloherätäjäle Tartese Heinolõ ka Uma Lehe toimõndusõ puult!

Ja muidoki pall’o õnnõ kõigilõ Eesti Vabariigi aastapääväs!

Rahmani Jan


Lasva miihikuur ja Tartese perreansambli ütenkuun püüne pääl. Rahmani Jani pilt

Üts lugu tagasi
Järgmäne lugu
Jaga seod artiklit