Mõnõ meelest om naastõrahvas vana sis, ku täl inämp võid suun är ei sula. Mõnõ meelest sis, ku suvitsõl aol om tä hainategemise aigu unõhtõt koolnuna maaha matta ja katõ nädäli peräst omma jo kärbläse kirstun jaol.

Oll’ aig, ku Eesti kruun oll’ jo tulnu, a iks oll’ egäsugumadsõst söögi- ja joogikraamist puudus, pidi iks viil tutvust kasutama, et midägi hääd ka kätte saia. Väega nigu es tahaki midägi, a ku mõni tahtsõ määnestki ekstra maiguga kohvisorti, sis säändse ka sait säält Mustamäe turu päält, kon ma ütskõrd loi är 83 esi kohvisorti. Mõnõ sordi olliva iks peris kavva ostjit uutnu, tuud sai nätä kuupääväst kohvipaki pääl.

Üte mu koolivele naanõ tüüt’ Saksin. Tuu om sääne kotus, kon pandas inemiisi paari. Iks niimuudu, et naanõ mehega. Tuu aig viil säänest küsümüst es olõ nõstõtu, et kink vahel tuu abielu piäs olõma. Nuilõ paariminejile oll’ ette nättü ka määndsidki soodustuisi. Pulmõ puhul saiva sampust hää hinnaga ja tuud jäi vahel ka majarahvalõ jagamisõs.

Vinne aigu naasõ pässivä jo 55aastadsõlt pinsi pääle, a mi teimi iks tüüd edesi. Ma kaaruti turistõga liina pite ja kaarutasi viil parhillaki, ku koroonat ei olõs ja turistõ olõs. A padruuga jäi mul sääl per-büroon fassaaditüü päält back roundi, nigu välämaa keelen üteldäs. Kodo tä joht es jää, a nakas’ surmõ tõsidsõ näoga uman kabinetin kirja pandma. Tüü oll’ täl hingelidselt peris rassõ, es tohe kõlistamisõ pääle inämp kellegi kuulmisõ põhjust vällä üteldä ja egäsugumast muud janti. Saimi iks vahel liina pääl kokko ja arotimi nuid elo ja surma asjo.

Mullõ omma inemise ja näide üllenpidämine kõgõ huvvi paknu ja nii ma sai ka võimalusõ vahel olla sõbrantsi assistent. Tullimi ütskõrd lõunapausilt rahvusraamadukogo kohvikust, jäimi Pärnu maantii ülekäügi pääl uutma rohilist tuld ja sis lätsimi – õkva ja viil õkva. Vahepääl olõs pidänü saarõkõsõ pääle rohilist tuld uutma jäämä. Auto, mis tull’, es aja meile pääle, a põrot’ õkva vasta trammi. Kõik jäimi saisma. Autojuht, tramm ja mi kah. Pia oll’ politsei kah paiga pääl. Tetti muidogi protokoll.

Õhtulehen oll’ järgmäne päiv kirotõt, et kats 57aastast VANURIT põhjustiva Tal’nan Pärnu maantii pääl trammi ja auto kokkopõrkamisõ. Õnnõs mi nimmi es olõ kirja pantu. Sis ku 75 saimi, tei tuust stand-up-etteastõ. Oll’ põhjust sampust juvva, ello jäimi. Nikani ku suu matsus ja jalg tatsus, ei taha viil vanainemine olla.

Latsõpõlvõn iks latsõ tahtva ruttu suurõs saia, a kõik vana inemise ei taha olla vanainemise. Ma kah ei taha, tuuperäst tiigi vahel nuid tempõ, mis latsõpõlvõn tegemäldä jäivä.

Plumanni Kaja-Riina


Reimanni Hildegardi tsehkendüs

Üts lugu tagasi
Järgmäne lugu
Jaga seod artiklit