E STuudio kammõrkoori nimi om seost sügüsest Helü, edimäne kõrd laulõtas vahtsõ nime all Muhu saarõ pääl 24. süküskuul.

Koori dirigent Josingu Küllike kõnõl’, et 70 nimekandidaadist jäi sõgla pääle kolm. A naidõ seen olõ õs Hellü, tuu käve viil manu koori laulja Pelisaarõ Kadri. «Lõpus hääletimi ja kohal olnust 30 lauljast 25 olli Helü puult,» selet’ koorijuht.

Tä ütel’, et kaaluti ka nimmi Kõla ja Heli, a Helü tundu süvämb ja mitmõhelülidsemb.

«Inämbüs mi lauljist omma Lõunõ-Eesti juuriga, a seo nimi miildüs ka mi saarlaisist lauljilõ,» ütel’ Josing.

E STuudio kammõrkoori lei Lokko Külli 2004. aastagal, 2012. aastagast juhatas kuuri üten abiliisiga koorist vällä kasunu Josingu Küllike. Kuur om pall’o kittä saanu, näütüses timahavva hainakuun saadi Walesis Llangollenis riikevaihõlidsõl festivaalil segäkuurõ siän 2. kotus.

Kammõrkoorin om parhilla 32 lauljat, miihi oodõtas manu. Huvilidsõ andku hindäst teedä dirigendile tel 5346 3437 vai kyllikejosing@gmail.com.

Allasõ Tiia

Kammõrkuur Helü.
Kammõrkuur Helü. Pilt eräkogost

Jaga seod artiklit